അകക്കാഴ്ച - 04
നബീൽ മഹ്‌ബൂബി
അല്ലാഹുവിലേക്കുള്ള പാതയാണ് സയ്യിദുനാ ഗൗസുൽ അഅസം ശൈഖ് മുഹ്‌യുദ്ധീൻ അബ്ദുൽ ഖാദിർ ജീലാനി(റ). ആ പരിശുദ്ധ പാതയെ ക്കുറിച്ച വിചാരപ്പെടലുകളും ഓര്മപ്പെടുത്തലുകളുമാണ് റബീഉൽ ആഖിർ. അവിടുത്തെ പവിത്ര സാന്നിധ്യത്തിലേക്ക് ചേർന്നു നിൽക്കുമ്പോഴാണ് നമ്മുടെ ദീൻ ജീവസ്സുറ്റതാകുന്നത്. അഹന്തയുടെ അന്ധകാരം അകറ്റി ആത്മജ്ഞാനത്തിന്റെ നിറവെളിച്ചം പകർന്നെടുക്കുമ്പോഴാണ് ആ അനശ്വര ജീവൻ സ്വായത്തമാകുന്നത്. സർവ്വ വലിയ്യുകളും അവിടുത്തേക്ക് തലതാഴ്തിത്തിക്കൊടുത്തതും ഈ ജീവൻ നേടിയെടുക്കാനായിരുന്നു. എങ്കിൽ അറിവുകളും അധ്വാനങ്ങളും ത്യാഗങ്ങളും കർമ്മങ്ങളുമൊന്നുമില്ലാത്ത നമുക്ക് അവിടുത്തോട് ചേർന്ന് നിൽക്കുക എന്നല്ലാതെ മറ്റെന്തു മാർഗ്ഗമാണുള്ളത് ? ജന്മം കൊണ്ട് നേടിയ പട്ടങ്ങളും ഗ്രന്ഥങ്ങളിൽ നിന്ന് നേടിയ പേരും പെരുമയും പിന്നെ ഇവയെല്ലാം ഒരുമിച്ച് കരസ്ഥമാക്കിയ നേതൃത്വങ്ങളൊന്നും ഈ ജീവന്റെ ലബ്ധിക്കു വഴിയൊരുക്കുകയില്ല തന്നെ, അതെത്ര ഉന്നതനാണെകിലും, കഠിനമായ സാധനകൾ കൊണ്ട് അനന്തമായ ആകാശത്തു പാറിപ്പറക്കാനായാലും ആർത്തലക്കുന്ന തിരമാലകൾക്കു മുകളിലൂടെ അനായാസം നടന്നുപോകാനായാലും ശെരി, അവിടുന്ന് തന്നെയാണ് ജീവൻ, ദീനിന്റെ ജീവദാതാവ്.
ശൈഖ് അബു മസ്ഊദ് ബിൻ അബീബക്കർ ഹരിമി (റ) റിപ്പോർട്ട് ചെയ്യുന്നു, ശൈഖ് അഹമ്മദ് ജാം (റ) എന്ന പേരിൽ ഒരു മഹാനായ സൂഫി ഉണ്ടായിരുന്നു, അദ്ദേഹം പോകുന്നിടത്തെല്ലാം യാത്ര ചെയ്‌തിരുന്നത് ഒരു സിംഹത്തിന്റെ പുറത്തായിരുന്നു. താൻ സന്ദർശിക്കുന്ന എല്ലാ നഗരങ്ങളിലും, തന്റെ സിംഹത്തിന്റെ ഭക്ഷണമായി ഒരു പശുവിനെ അയയ്ക്കാൻ നഗരവാസികളോട് ആവശ്യപ്പെടുന്നത് അദ്ദേഹത്തിന്റെ പതിവായിരുന്നു. ഒരിക്കൽ അദ്ദേഹം ഒരു നഗരത്തിൽ ചെന്ന് ആ നഗരത്തിലെ ജ്ഞാനിയായ ഒരു മനുഷ്യനോട് തന്റെ സിംഹത്തിനായി ഒരു പശുവിനെ ആവശ്യപ്പെട്ടു. ചോദിക്കപ്പെട്ടതു പോലെ ആ ജ്ഞാനി ഒരു പശുവിനെ അദ്ദേഹത്തിന്റെ അടുത്തേക്ക് അയച്ചു, എന്നിട്ട് പറഞ്ഞു, "നിങ്ങൾ എപ്പോഴെങ്കിലും ബാഗ്ദാദിലേക്ക് പോയാൽ, നിങ്ങളുടെ സിംഹത്തിന് സ്വാഗത ക്ഷണം ലഭിക്കും."
ശൈഖ് അഹമ്മദ് ജാം (റ) പിന്നീട് ബാഗ്ദാദ് ശരീഫിലേക്ക് പോയി. ബാഗ്ദാദിൽ എത്തിയ അദ്ദേഹം തന്റെ ശിഷ്യന്മാരിൽ ഒരാളെ ഗൗസുൽ അഅസം ശൈഖ് മുഹ്‌യുദ്ധീൻ അബ്ദുൽ ഖാദിർ ജീലാനി(റ) യുടെ അടുത്തേക്ക് അയച്ചു, തന്റെ സിംഹത്തിന് ഭക്ഷണമായി ഒരു പശുവിനെ അയക്കാൻ ആവശ്യപ്പെടുകയും ചെയ്തു. ദിവസങ്ങൾക്കു മുമ്പേ തന്നെ മഹാനായ ഗൗസുൽ അഅസം (റ) അദ്ദേഹത്തിന്റെ വരവിനെ കുറിച്ച് അറിയുകയും അദ്ദേഹത്തിന്റെ സിംഹത്തിന് വേണ്ടി ഒരു പശുവിനെ വളർത്താൻ നേരത്തെ തന്നെ ഏർപ്പാട് ചെയ്യുകയും ചെയ്തിരുന്നു. ശൈഖ് അഹമ്മദ് ജാമിന്റെ (റ) അവശ്യ പ്രകാരം ഗൗസുൽ അഅസം ശൈഖ് അബ്ദുൽ ഖാദിർ ജീലാനി (റ) തന്റെ ശിഷ്യന്മാരിൽ ഒരാളെ ഒരു പശുവുമായി അദ്ദേഹത്തിന്റെ അടുത്തേക്ക് അയച്ചു.
ശിഷ്യൻ പശുവിനെയും കൂട്ടിക്കൊണ്ടുപോയപ്പോൾ ശൈഖ് അബ്ദുൽ ഖാദിർ ജീലാനി(റ) യുടെ വീടിന് പുറത്ത് ഇരുന്ന ഒരു മെലിഞ്ഞു ക്ഷീണിച്ച പ്രായം ചെന്ന ഒരു തെരുവ് നായ ആ ശിഷ്യനെ അനുഗമിച്ചു. ശിഷ്യൻ ശൈഖ് അഹമ്മദ് ജാമിന് (റ) പശുവിനെ സമ്മാനിച്ചു, അദ്ദേഹം സിംഹത്തിന് ഭക്ഷണം നൽകാനുള്ള സൂചന നൽകി. സിംഹം പശുവിന്റെ അടുത്തേക്ക് ഓടിയപ്പോൾ ഈ തെരുവ് നായ സിംഹത്തിന് നേരെ കുതിക്കുകയും അത് സിംഹത്തെ കഴുത്തിൽ പിടിച്ച് വയറു കീറി ഒടുവിൽ ആ സിംഹത്തെ കൊല്ലുകയും ചെയ്തു, പിന്നീട് നായ സിംഹത്തെ വലിച്ചിഴച്ച് ഗൗസുൽ അഅസം (റ) ന്റെ മുന്നിലേക്ക് എറിഞ്ഞു കൊടുക്കയും ചെയ്തു.
ഇത് കണ്ട ശൈഖ് അഹമ്മദ് ജാം (റ) വളരെ ലജ്ജിച്ചു തല താഴ്ത്തുകയും തന്റെ തെറ്റു മനസ്സിലാക്കുകയും ചെയ്തു. പരിശുദ്ധരായ ഗൗസുൽ അഅസം (റ) ന്റെ മുന്നിൽ അദ്ദേഹം സ്വയം കീഴൊതുങ്ങി തന്റെ ധിക്കാരപരമായ പെരുമാറ്റത്തിന് മാപ്പ് ചോദിക്കുകയും ചെയ്തു.
എന്തായിരിക്കും ഇക്കാര്യത്തിലെ ചിന്ത പാഠങ്ങൾ ?
വിശുദ്ധ കലിമയും തിരുനബി(സ)യുടെ ആത്മീയമാര്‍ഗവുമില്ലാത്തവര്‍ പാറിപ്പറക്കാനുള്ള ആത്മീയശേഷി നേടി അതിന്റെ അവസ്ഥാവിശേഷങ്ങളില്‍ പെട്ടുപോയാല്‍ അവര്‍ വഞ്ചിതരാകും. തിരുനബി(സ) ജീവിച്ച ജീവിതശൈലിയാണ് അത്യുത്തമമെന്ന് അവര്‍ മനസ്സിലാക്കേണ്ടതുണ്ട്. തീര്‍ച്ചയായും ഞാന്‍ നിങ്ങളെ പോലെ ഒരു മനുഷ്യനാണ് എന്ന അവസ്ഥയില്‍ ഭൗതികലോകത്ത് താമസിക്കാനാകണം. അപ്പോള്‍ അവര്‍ക്ക് ഏറ്റവും വലിയ കറാമത്ത് അഥവാ അദ്ഭുതകൃത്യം നടത്താനാവുന്നു. ആ അദ്ഭൂതകൃത്യം സ്വയം വിശുദ്ധകലിമതുത്വയ്യിബയുടെ പൂര്‍ണത സാക്ഷാല്‍ക്കരിക്കുകയും മറ്റേതൊക്കെയോ മൃഗീയാവസ്ഥകളിലുള്ളവരെ അത്തരം അത്യുന്നതാവസ്ഥകളിലേക്കു കൂട്ടിക്കൊണ്ടു വരികയോ ചെയ്യാനാവു. അതുകൊണ്ട് പറന്നുപറന്ന് എത്താവുന്നതിനപ്പുറമുള്ള ഉയരങ്ങളെ കുറിച്ച് പറക്കുന്ന വലിയെ ബോധിപ്പിക്കണമെങ്കില്‍ അവനെ പടിക്കല്‍ തളച്ച് തന്റെ യാഥാര്‍ഥ്യത്തെ കുറിച്ച് ബോധ്യപ്പെടുത്തുക തന്നെ വേണം. എപ്പോഴും പറക്കാനാവുന്നവന് ഒരുഘട്ടത്തില്‍ താനാഗ്രഹിച്ചിട്ടും പറക്കാനാവാതെ വരുമ്പോള്‍ നിലവിലെ ആത്മീയാവസ്ഥയുടെ പരിമിതിയെ കുറിച്ചു ബോധവാനാകുകയും സത്യത്തെ കുറിച്ചു പുനപരിശോധിക്കാനും സാഹചര്യമൊരുങ്ങുന്നു. അത്തരക്കാരെ സ്വന്തം അസ്തിത്വത്തെ കുറിച്ച ബോധമായ അഹത്തില്‍ നിന്നും അഹങ്കാരത്തില്‍ നിന്നും തൗബ അഥവാ പശ്ചാത്താപത്തിലൂടെ മോചിപ്പിച്ച് തൗഹീദിലേക്കു ചേര്‍ക്കാനുമാവും.
Connect with Us