കാണാമറയത്തെ ഖുര്‍ആന്‍
ഇതിഹാസങ്ങളുടെ കപ്പല്‍ യാത്ര
മൂസാ നബി (അ) ഖിള്ര്‍ (അ)നെ കണ്ടുമുട്ടി. രണ്ടു ഇതിഹാസങ്ങള്‍. രണ്ടു ലോകങ്ങള്‍. രണ്ടു തട്ടുകള്‍. രണ്ടു തരം അറിവുകള്‍. പ്രവാചകന്‍, പ്രവാചകന്മാരിലെ പ്രത്യേകക്കാരിലൊരാള്‍, പ്രത്യേകക്കാരിലെ അഞ്ചിലൊരാള്‍, അല്ലാഹുവുമായി സംസാരിക്കുന്നയാള്‍. എന്നിട്ടും ഹഖീഖത്തിന്റെ ലോകത്തേക്ക് ചെന്നു നോക്കിയ നേരത്ത് മിണ്ടാതെ പിന്തുടരനായിരുന്നു മൂസാ നബിക്കുള്ള നിര്‍ദേശം.
ഇന്ന് വെള്ളി. പള്ളികളില്‍ അല്‍കഹ്ഫ് പാരായണങ്ങള്‍ പരന്നൊഴുകുന്ന പകല്‍. മൂസാ-ഖിള്ര്‍ (അ) കൂടിക്കാഴ്ച അയവിറക്കുന്ന കഹ്ഫ്. ഓതിക്കൊണ്ടിരിക്കുന്ന അക്ഷരങ്ങളിലൂടെ നൂറ്റാണ്ടുകള്‍ക്കപ്പുറത്തു നിന്ന് അവര്‍ സംസാരിക്കുന്നു. അതിനെ നാം ഖുര്‍ആന്‍ എന്ന് കരുതിപ്പോരുന്നു. പക്ഷേ, ആ പദാവലികളോ അതിലെ അക്ഷരങ്ങളോ അല്ല; അക്ഷരങ്ങളില്‍ ഉടുത്തൊരുങ്ങി, സ്വരമാധുരി കൊണ്ട് മോഹിപ്പിക്കുമ്പോഴും അതിനകത്ത് ഒളിച്ചിരിക്കുന്ന ഒരു വെളിച്ചമുണ്ട്. അതാണ് ഖുര്‍ആന്‍. ആഴങ്ങളിലെ മൗനമാണത്. ധ്യാന മാര്‍ഗങ്ങളില്‍ മാത്രം കിട്ടുന്ന ജ്ഞാനമാണത്. അത് മുസ്ഹഫില്‍ നിന്ന് പിടിച്ചെടുക്കാനാകില്ല. വെളിച്ചങ്ങള്‍ പിടിച്ചെടുക്കുന്നൊരു കണ്ണാടി വേണം; തെളിച്ചമുള്ളൊരു ഹൃദയത്തെ നേടണം. ശേഷം അവരുടെ പിന്നാലെ നാം കപ്പല്‍ കയറണം.
മൂസാ-ഖിള്ര്‍ (അ) കൂടിക്കാഴ്ചയും അതു തന്നെയായിരുന്നു. മൂസാ (അ) ഖിള്ര്‍ (അ)നെ തേടിപ്പിടിച്ചു. തന്റെ പക്കല്‍ നിന്നുള്ള റഹ്‌മത്തും ജ്ഞാനവും നല്‍കിയ അടിമ എന്നാണ് അല്ലാഹു ഖിള്ര്‍ (അ)നെ വിശേഷിപ്പിച്ചത്. റുഷ്ദ് പഠിക്കാന്‍ ഒപ്പം കൂടട്ടേ എന്നായി മൂസാ നബി. താങ്കള്‍ക്ക് എന്റെ കൂടെ ക്ഷമിച്ചു കഴിയാനാകില്ലെന്ന് മറുപടി. സൂക്ഷ്മ ജ്ഞാനം ലഭിക്കാത്ത ഒരു കാര്യത്തില്‍ താങ്കളെങ്ങനെ ക്ഷമ പാലിക്കാനാണെന്നൊരു ചോദ്യവും.
ക്ഷമിക്കാം എന്ന വാക്ക് നല്‍കി മൂസാനബി (അ) ഒപ്പം ചേര്‍ന്നു. പറഞ്ഞു തരും വരെ ഒന്നും ചോദിക്കരുതെന്ന് ഒരിക്കല്‍ കൂടി താക്കീത് ചെയ്തിട്ടാണ് ഖിള് ര്‍(അ) സമ്മതം നല്‍കിയത്.
അവര്‍ രണ്ടു പേരും കപ്പല്‍ കയറി. ഖിള്ര്‍ (അ) കപ്പല്‍ തകര്‍ക്കുകയും മൂസാ (അ) അത് ചോദ്യം ചെയ്യുകയും ഒടുവില്‍ താക്കീത് ഓര്‍മപ്പെടുത്തിയപ്പോള്‍ ക്ഷമ ചോദിക്കുകയും ചെയ്തു. കഥയങ്ങനെ തുടരുന്നു.
മുഹമ്മദീയ സഞ്ചാരികള്‍ ആഴ്ച തോറും പ്രത്യേക പുണ്യത്തോടെ നൂറ്റാണ്ടുകളായി അതങ്ങനെ ഓതിക്കൊണ്ടിരിക്കുന്നു. എന്താണ് ഈ കഥക്കു പിന്നിലെ കാര്യം? നമുക്ക് നമ്മിലേക്ക് വഴി കാണിച്ചുതരികയാണ് ഈ സൂക്തങ്ങളുമെന്ന് ശൈഖുല്‍ അക്ബര്‍ മുഹ്‌യിദ്ദീന്‍ ഇബ്‌നു അറബി(റ)ന്റെ വ്യാഖ്യാനങ്ങളില്‍ നിന്ന് മനസ്സിലാകുന്നു. റുശ്ദ് തേടി വന്ന മൂസാനബിക്ക് മുര്‍ശിദിന്റെ റോളില്‍ ഖിള്ര്‍ (അ) കാണിച്ചുകൊടുക്കുന്ന മാര്‍ഗദര്‍ശനമെന്തെന്ന് നോക്കാം.
ഖിള്ര്‍ (അ)ന് നല്‍കപ്പെട്ട റഹ്‌മത്തും ലദുന്നിയായ ഇല്‍മും എന്താണെന്ന് ഇബ്‌നു അറബി (റ) വിശദീകരിക്കുന്നു.
റഹ്‌മത്ത് - വസ്തുക്കളില്‍ നിന്ന് വേര്‍പ്പെട്ടുള്ള അര്‍ത്ഥവത്തായ സമ്പൂര്‍ണ്ണത, അതോടൊപ്പം സാമീപ്യം കൊണ്ട് കിട്ടിയ നിഷ്‌കളങ്ക വെളിച്ചം.
ഇല്‍മ് - പഠനത്തിന്റെ മാനുഷിക രീതികളിലൂടെയല്ലാതെ വിശുദ്ധമായ മഅ്‌രിഫത്തും മൊത്തമായ ലദുന്നിയായ ഹഖാഇഖുകളും.
തുടര്‍ന്ന് ഇബ്‌നു അറബി(റ) വിശദീകരിക്കുന്നത് ഇങ്ങനെ ചുരുക്കാം: പിന്തുടരട്ടെ എന്ന മൂസാ നബിയുടെ ചോദ്യം ആ പൂര്‍ണ്ണതയുടെ മാര്‍ഗത്തില്‍ സഞ്ചരിക്കാനുള്ള ആഗ്രഹ പ്രകടനമാണ്. എന്നാല്‍, മറഞ്ഞിരിക്കുന്ന ഹഖാഇഖുകളെ പിന്തുടരാന്‍ താങ്കള്‍ അശക്തനാണെന്ന് മറുപടി ലഭിക്കുന്നു. കാരണം, വസ്തുലോകങ്ങളില്‍ നിന്ന് വേര്‍പ്പെട്ടിട്ടില്ലാത്ത, ശരീരത്തിന്റെ ഇരുട്ട് കൊണ്ട് മറ വീണു കിടക്കുന്ന ഒരാള്‍ക്കത് സാധ്യമല്ല. അതിനാല്‍ താനുമായി കൂട്ടുകൂടുക അസാധ്യമെന്ന് മുര്‍ശിദ് മുരീദിനെ ബോധ്യപ്പെടുത്തുന്നു.
എതിര് പ്രവര്‍ത്തിക്കുകയില്ലെന്ന മൂസാ നബിയുടെ വാക്കിന്റെ അര്‍ത്ഥം ഞാന്‍ താങ്കളിലേക്ക് മുന്നിട്ട്, അനുസരണകള്‍ക്ക് തയാറായി നില്‍ക്കുകയാണ് എന്നാണ്. തന്റെ ഉദ്ദേശ്യം ശുദ്ധവും സത്യസന്ധവുമാണ്.
പിന്തുടര്‍ന്നാല്‍ പിന്നെ ചോദ്യങ്ങളൊന്നും വേണ്ട എന്നാണ് ഖിള്ര്‍ (അ)ന്റെ കല്‍പ്പന. അതായത്, അത്യുന്നതിയിലേക്കുള്ള ആ യാത്രയെന്നാല്‍ കര്‍മങ്ങളോടെയും രിയാളകളിലൂടെയും സ്വഭാവസംസ്‌കരണത്തിലൂടെയും മുജാഹദകളിലൂടെയും മുര്‍ശിദിനെ പിന്തുടരലാണ്. അവിടെ ഹഖാഇഖുകളെക്കുറിച്ചുള്ള ചോദ്യങ്ങളരുത്.
അറിയിച്ചു തരും വരെ മിണ്ടാതെ പിന്തുടരണമെന്നാണ് ഖിള്ര്‍ (അ) പറഞ്ഞിരിക്കുന്നത്. ശാരീരികവും മാനസികവുമായ ഇടപാടുകളില്‍ നിന്നെല്ലാം വിട്ടുനില്‍ക്കുമ്പോള്‍ മാത്രമേ മറഞ്ഞിരിക്കുന്ന ഹഖാഇഖുകള്‍ അറിയിക്കപ്പെടുകയുള്ളൂ എന്നാണതിന്റെ ഉദ്ദേശ്യം.
അടിമത്വത്തിന് പാകപ്പെടുത്തുന്ന രിയാളകള്‍ നിറഞ്ഞ ശരീരമെന്ന കപ്പലിലാണ് അവര്‍ കയറുന്നത്. വിശുദ്ധിയുടെ സമുദ്രത്തിലൂടെ അല്ലാഹുവിലേക്കാണ് അത് സഞ്ചരിക്കുന്നത്. അപ്പോള്‍, ഖിള്ര്‍ (അ) കപ്പല്‍ പലക തകര്‍ക്കുന്നത് ശരീരത്തിനേല്‍പ്പിക്കുന്ന ക്ഷീണമാണ്. ആഹാരം കുറച്ചും ദുര്‍ബലപ്പെടുത്തിയും വ്യവസ്ഥകള്‍ തെറ്റിച്ചും ശരീരത്തെ നിസാരമാക്കുകയാണ് മുര്‍ശിദ്.
കൊല്ലപ്പെട്ട കുട്ടി
فَانطَلَقَا حَتَّىٰ إِذَا لَقِيَا غُلَامًا فَقَتَلَهُ قَالَ أَقَتَلْتَ نَفْسًا زَكِيَّةً بِغَيْرِ نَفْسٍ لَّقَدْ جِئْتَ شَيْئًا نُّكْرًا ۞ قَالَ أَلَمْ أَقُل لَّكَ إِنَّكَ لَن تَسْتَطِيعَ مَعِيَ صَبْرًا ۞ قَالَ إِن سَأَلْتُكَ عَن شَيْءٍ بَعْدَهَا فَلَا تُصَاحِبْنِي ۖ قَدْ بَلَغْتَ مِن لَّدُنِّي عُذْرًا ۞ - (سورة الكهف)
ആശയം:
കപ്പലിറങ്ങി മൂസാ നബി(അ)യും ഖിള് ര്‍ അലൈഹിസ്സലാമും മുന്നോട്ട് നീങ്ങി. വഴിയില്‍ അവര്‍ ഒരു കുട്ടിയെ കാണുന്നു. ഖിള്ര്‍ (അ) അവനെ കൊന്നുകളയുന്നു. മൂസാ നബിയത് ചോദ്യം ചെയ്യുന്നു: നിങ്ങള്‍ ഒരു നിഷ്‌കളങ്ക നഫ്‌സിനെ കൊന്നുകളഞ്ഞോ?
എന്റെ കൂടെ ക്ഷമിച്ചു കഴിയാനാകില്ലെന്ന് ഞാന്‍ നേരത്തേ പറഞ്ഞതല്ലേ - ഖിള്ര്‍ (അ) ഓര്‍മപ്പെടുത്തുന്നു.
ഇനി വല്ലതും ഞാന്‍ ചോദിച്ചാല്‍ താങ്കളെന്നെ കൂടെ കൂട്ടേണ്ട - മൂസാ നബി(അ) വീഴ്ച സമ്മതിക്കുന്നു.
ഇബ്‌നു അറബി(റ)വിന്റെ തഫ്‌സീര്‍:
സൂറത്തുല്‍ കഹ്ഫിലെ ഈ ആയത്തുകളിൽ നിന്ന് ശൈഖുല്‍ അക്ബര്‍ മുഹ്‌യിദ്ദീന്‍ ഇബ്‌നു അറബി (റ) തുറന്നുവെക്കുന്ന ലോകം ഉള്‍സാര വിരുന്നാണ്.
അതിനെ നമുക്ക് ഇങ്ങനെ ചുരുക്കാം:
കൊല്ലപ്പെടുന്ന കുട്ടി എന്നാല്‍ നഫ്‌സാണ്. തനിസ്വഭാവം വെളിവാക്കി, ഖല്‍ബിന് മറയിട്ട അമ്മാറത്തുന്‍ ബിസ്സൂഅ് ആയൊരു നഫ്‌സായിരുന്നു അത്. കോപത്തെയും കാമത്തെയും സമാനമായ പലതിനെയും വധിച്ചു കൊണ്ടാണ് തെറ്റിന് പ്രേരിപ്പിക്കുന്ന ഈ നഫ്‌സിന്റെ കഥകഴിക്കുന്നത്.
മൂസാ നബി അതിനെ ചോദ്യം ചെയ്യുമ്പോള്‍ നഫ്‌സിനോടുള്ള ഹൃദയാനുകമ്പ പുറത്തുചാടുന്നു. അന്നേരം റൂഹ് ഇടപെടുന്നു, നിങ്ങള്‍ക്കെന്റെ കൂടെ ക്ഷമിച്ചു കഴിയാനാകില്ലെന്ന് ഞാന്‍ നേരത്തേ പറഞ്ഞതല്ലേ - എന്ന് താക്കീത് ചെയ്യുന്നു.
ഉടനെ തന്റെ വീഴ്ച തിരിച്ചറിഞ്ഞ ചോദ്യകർത്താവ് കുറ്റമേറ്റ് പശ്ചാത്തപിക്കുന്നു. ചോദ്യം ചെയ്യാൻ ചാടിവീണതും മാപ്പപേക്ഷയുമായി ഉടൻ തന്നെ പിൻവാങ്ങിയതും ചാഞ്ചാട്ടക്കാരനായ നഫ്‌സു ലവ്വാമയായിരുന്നു.
മുത്മഇന്നയുടെ മതിൽ
അല്‍കഹ്ഫ് അദ്ധ്യായത്തിലെ ചരിത്രം ഖുര്‍ആന്‍ തുടരുന്നു:
അനന്തരം അവര്‍ ഇരുവരും പോയി. അങ്ങനെ അവര്‍ ഇരുവരും ഒരു ഗ്രാമവാസികളുടെ അടുക്കല്‍ ചെന്നപ്പോള്‍ ആ ഗ്രാമവാസികളോട് അവര്‍ ഭക്ഷണം ആവശ്യപ്പെട്ടു. എന്നാല്‍ ഇവരെ സല്‍ക്കരിക്കുവാന്‍ അവര്‍ വൈമനസ്യം കാണിക്കുകയാണ് ചെയ്തത്. അപ്പോള്‍ പൊളിഞ്ഞുവീഴാനൊരുങ്ങുന്ന ഒരു മതില്‍ അവര്‍ അവിടെ കണ്ടെത്തി. ഉടനെ അദ്ദേഹം അത് നേരെയാക്കി. മൂസാ പറഞ്ഞു: താങ്കള്‍ ഉദ്ദേശിച്ചിരുന്നെങ്കില്‍ അതിന്റെ പേരില്‍ താങ്കള്‍ക്ക് വല്ല പ്രതിഫലവും വാങ്ങാമായിരുന്നു.
അദ്ദേഹം പറഞ്ഞു: ഇത് ഞാനും താങ്കളും തമ്മിലുള്ള വേര്‍പാടാകുന്നു. ഏതൊരു കാര്യത്തിന്റെ പേരില്‍ താങ്കള്‍ക്ക് ക്ഷമിക്കാന്‍ കഴിയാതിരുന്നുവോ അതിന്റെ പൊരുള്‍ ഞാന്‍ താങ്കള്‍ക്ക് അറിയിച്ച് തരാം.
ഇവിടെ പറഞ്ഞിട്ടുള്ള ഗ്രാവാസികള്‍ എന്നാല്‍ ശാരീരിക ശക്തികള്‍ ആണെന്ന് ശൈഖുല്‍ അക്ബര്‍ ഇബ്‌നു അറബി (റ) വ്യാഖ്യാനിക്കുന്നു. അവയോട് ആവശ്യപ്പെട്ടത് റൂഹാനിയായ ഭക്ഷണമാണ്. ആവശ്യക്കാരുടെ അന്നേരത്തെ ഭക്ഷണമെന്നത് ഖുദ്‌സിയ്യായ പ്രകാശങ്ങളില്‍ നിന്നും ഇലാഹിയ്യായ മഅ്‌രിഫത്തില്‍ നിന്നുമായിരുന്നു. ശാരീരിക ശക്തികളെ സംബന്ധിച്ചിടത്തോളം തങ്ങളേക്കാള്‍ മുകളില്‍ കിടക്കുന്ന കാര്യമായിരുന്നു അത്. അതിനാലാണ് അവര്‍ വിസമ്മതിച്ചത്.
ഖിള്ര്‍ (അ) നേരെയാക്കിയ പൊളിഞ്ഞുവീഴാറായ മതില്‍ നഫ്‌സു മുത്മഇന്നയാണ്. കെട്ടിയുറപ്പിച്ചത് എന്നര്‍ത്ഥത്തിലാണ് മതില്‍ എന്നു വിളിച്ചത്. നഫ്‌സു അമ്മാറത്തിനെ രിയാളയിലൂടെ കൊലപ്പെടുത്തിയ ശേഷം സുദൃഢമായുയര്‍ത്തിയ നഫ്‌സാണല്ലോ മുത്മഇന്ന. മാത്രമല്ല, സ്വയം ചലിക്കാനോ ഉദ്ദേശ്യം പോലെ നീങ്ങാനോ സാധിക്കാത്തത് എന്നും മതില്‍ കൊണ്ട് അര്‍ത്ഥമാക്കിയിരിക്കുന്നു. അതിനെ ദൗര്‍ബല്യം ബാധിക്കുന്നത് കണ്ടപ്പോള്‍ സ്വഭാവസമ്പൂര്‍ണ്ണത കൊണ്ടും ശ്രേഷ്ഠ കര്‍മങ്ങള്‍ കൊണ്ടും ബലപ്പെടുത്തുന്ന പണിയാണ് ഖിള്ര്‍(അ)മിന്റെ മതിലുകെട്ടല്‍. അതോടെ, ദുര്‍ഗുണങ്ങളുടെ സ്ഥാനത്ത് സദ്ഗുണങ്ങള്‍ സ്ഥാനംപിടിച്ചു.
ചെയ്ത ജോലിക്ക് കൂലി വാങ്ങാമായിരുന്നു - എന്ന മൂസാ നബിയുടെ പ്രതികരണത്തെ ഖല്‍ബിയ്യായ ചാഞ്ചാട്ടമായാണ് ഇബ്‌നു അറബി തങ്ങള്‍ വ്യാഖ്യാനിക്കുന്നത്. ശ്രേഷ്ഠ കര്‍മങ്ങള്‍ക്കും രിയാളകള്‍ക്കുമെല്ലാം പ്രതിഫലം തേടുക എന്ന താഴ്ന്ന അവസ്ഥയെയാണത് സൂചിപ്പിക്കുന്നത്.
ക്ഷമ കൈവിട്ട് മൂന്നാമതും മൂസാനബി (അ) ചോദ്യവുമായി വന്നതോടെ ഖിള്ര്‍ (അ) ആ യാത്ര അവസാനിപ്പിക്കുന്നു. എന്നിട്ട് മൂസാനബിയോട് തന്റെ കര്‍മങ്ങളുടെ കാണാപ്പുറം വിശദീകരിക്കുന്നു. അതിന്റെ ഉള്ളറിവ് ഇബ്‌നു അറബി (റ) നമുക്ക് ഇങ്ങനെ മനസ്സിലാക്കിത്തരുന്നു:
''അഥവാ, എന്റെ മഖാമും നിങ്ങളുടെ മഖാമും തമ്മിലുള്ള മാറ്റവും എന്റെ ഹാലും നിങ്ങളുടെ ഹാലും തമ്മിലുള്ള മാറ്റവും ഇതാണ്. കാരണം, അമ്മാറത്തുന്നഫ്‌സിനെ രിയാളയിലൂടെയും വാഴ്ത്തപ്പെടുന്ന സ്വഭാവങ്ങളിലൂടെയും മാറ്റിയെടുക്കുന്നത് പ്രതിഫലത്തിന് വേണ്ടിയല്ല. അങ്ങനെയാകുമ്പോള്‍ അതിന് ശ്രേഷ്ഠതയോ പൂര്‍ണ്ണതയോ ഇല്ല. കാരണം, ശ്രേഷ്ഠത എന്നാല്‍ ദൈവിക സ്വഭാവങ്ങളിലേക്ക് ഉയരലാണ്. അങ്ങനെ സത്തയില്‍ ഉണ്ടാകുന്നത് അതിന്റെയാളില്‍ സംഭവിക്കും. വല്ലതും ആഗ്രഹിച്ചു കൊണ്ട് ചെയ്യുന്ന പുണ്യങ്ങള്‍ മറയാണ്. ശ്രേഷ്ഠതയല്ലത്, നിന്ദ്യതയാണ്. മറ വലിച്ചെറിഞ്ഞ് ആത്മാവിന്റെ വിശേഷണങ്ങളുടെ മൂടി തുറക്കണം. അദൃശ്യ ജ്ഞാന നേടാനും ദൈവിക വിശേഷണങ്ങള്‍ കൈവരിക്കാനും അല്ലാഹുവില്‍ ഫനാആയി അവനെക്കൊണ്ട് സാക്ഷാത്കരിക്കാനും പ്രകാശ ലോകത്തേക്ക് ഉയരണം എന്നാണ് ഉദ്ദേശ്യം.''
Connect with Us