ഭക്ഷണം: ഹലാലും ത്വയ്യിബും

 എന്താണ് ഹലാലായ ഭക്ഷണം?

അള്ളാഹു ഹറാമാക്കിയ ഭക്ഷണ പദാർത്ഥങ്ങൾ അല്ലാതിരിക്കൽ, പലിശയിൽ പെട്ടതാവാതിരിക്കൽ, ഹറാമായ മാർഗത്തിലൂടെ സമ്പാദിച്ചതല്ലാതിരിക്കൽ,അന്യായമായി അധീനപ്പെടുത്തിയതല്ലാതിരിക്കൽ, യുദ്ധ മുതലിൽ നിന്ന് മോഷ്ടിച്ചതല്ലാതിരിക്കൽ,വെറുക്കപ്പെട്ടല്ലാതിരിക്കൽ, ഭക്ഷണം ഹലാലോ ഹറാമോ സംശയമുള്ളതാവാതിരിക്കൽ എന്നീ ആറ് കാര്യങ്ങളിൽ നിന്നും പുറത്തായതാണ് ഹലാൽ എന്നത് കൊണ്ട് വിവക്ഷിക്കപ്പെടുന്നത്.

ത്വയ്യിബ് എന്നതും ഹലാൽ എന്നതും ഒന്ന് ആണെന്ന അഭിപ്രായമുള്ളവരുണ്ടെങ്കിലും പ്രബല അഭിപ്രായ പ്രകാരം ഹലാലും ത്വയ്യിബും രണ്ടാണ്. അള്ളാഹു മുമിനീങ്ങളോട് ഹലാലും ത്വയ്യിബും കഴിക്കാൻ പറഞ്ഞപ്പോൾ പ്രവാചകരോട് ത്വയ്യിബ് മാത്രമാണ് കഴിക്കാൻ പറഞ്ഞത്.

എന്താണ് ത്വയ്യിബ് ?

ത്വയ്യിബ് എന്താണെന്ന് പറയാൻ താഴെ ഉള്ള ഹദീസ് സഹായകരമാകും.

عن أبي هُرَيْرَةَ رضي الله عنه قال: قاَل رسُولُ الله صلى الله عليه وسلم: "إنَ الله طَيِّبٌ لا يَقْبَلُ إلا طَيِّبًا،

(അള്ളാഹു ത്വയ്യിബ് ആണ്, ത്വയ്യിബ് അല്ലാത്തത് അള്ളാഹു സ്വീകരിക്കുകയില്ല.)

അള്ളാഹു മോശത്തരങ്ങളെ തൊട്ടും ന്യൂനതകളെ തൊട്ടും മുക്‌തവാനും പരിശുദ്ധനുമാണ്. അതല്ലാത്തത് അവൻ ഇഷ്ട്ടപെടുകയോ, തൃപ്തിപ്പെടുകയോ, സ്വീകരിക്കുകയോ ഇല്ല.

എന്താണ് ത്വയ്യിബായ ഭക്ഷണം

ഹലാൽ ആണെന്ന് ഉറപ്പായിരിക്കണം (ഹലാൽ ആയ സമ്പത്തിന്റെ ആറ് ഗുണങ്ങൾ വേണം)

മറ്റൊരാളുടെ ഹഖ് അതിൽ ഉൾപ്പെടരുത് (സ്വന്തമായി അധ്വാനിച്ചുണ്ടാക്കിയ സമ്പത്ത്)

അഭിമാനത്തിന് ക്ഷതമേല്പിക്കുന്നത് ആകരുത് (ഒരാൾ ഒരു പരിപാടിക്ക് ക്ഷണിക്കാൻ മറന്നു, അവിടെ പോകാം പക്ഷെ ഭക്ഷണം കഴിക്കുന്നത് അഭിമാനകാരമല്ല)

ഹദ്‌യ ആണെങ്കിൽ തൃപ്തി പെട്ട് ഹദ്‌യ നല്കിയതായിരിക്കണം, കൊടുക്കുന്ന ആളും സ്വീകരിക്കുന്ന ആളും ഹറാമുകൾ ചെയ്യുന്ന ആളായിരിക്കരുത്.

മേൽ പറഞ്ഞ കാര്യങ്ങൾ ഒത്തു വന്നതാണ് ത്വയ്യിബ്.

ഖുർആനിൽ നാലിടത്ത് അള്ളാഹു ഭക്ഷണത്തെ സംബന്ധിച്ച് പറയുമ്പോൾ ഹലാലായ ഭക്ഷണമെന്നും ത്വയ്യിബായ ഭക്ഷണമെന്നും പറയുന്നുണ്ട്.

- {يَا أَيُّهَا النَّاسُ كُلُوا مِمَّا فِي الْأَرْضِ حَلَالًا طَيِّبًا وَلَا تَتَّبِعُوا خُطُوَاتِ الشَّيْطَانِ إِنَّهُ لَكُمْ عَدُوٌّ مُبِينٌ} البقرة/168.

(മനുഷ്യരേ, ഭൂമിയിലുള്ളതില്‍ നിന്ന് ഹലാലും ത്വയ്യിബുമായത് നിങ്ങള്‍ ഭക്ഷിച്ച് കൊള്ളുക. പിശാചിന്‍റെ കാലടികളെ നിങ്ങള്‍ പിന്തുടരാതിരിക്കുകയും ചെയ്യുക. അവന്‍ നിങ്ങളുടെ പ്രത്യക്ഷശത്രു തന്നെയാകുന്നു)

"‏تليت هذه الآية عند النبي صلى الله عليه وسلم ‏ { ‏يا أيها الناس كلوا مما في الأرض حلالاً طيبا‏ً } ‏ فقام سعد بن أبي وقاص فقال‏:‏ يا رسول الله أدع الله أن يجعلني مستجاب الدعوة‏.‏ فقال‏:‏ يا سعد أطب مطعمك تكن مستجاب الدعوة، والذي نفس محمد بيده إن الرجل ليقذف اللقمة الحرام في جوفه فما يتقبل منه أربعين يوماً، وأيما عبد نبت لحمه من السحت والربا فالنار أولى به‏‏"

ഒരിക്കൽ ഈ ആയത്ത് ഓതിയപ്പോൾ സഹദ് ബിൻ അബീ വഖാസ് (റ) എഴുന്നേറ്റ് നിന്ന് റസൂൽ (സ) യോട് പറഞ്ഞു:"യാ റസൂലള്ളാഹ്, എനിക്ക് എന്റെ ദുആകൾക്ക് ഉത്തരം കിട്ടുന്നവരിൽ ഉൾപ്പെടുത്താൻ അങ്ങ് അല്ലാഹുവിനോട് ദുആ ചെയ്യണം." അപ്പോൾ റസൂൽ (സ) പറഞ്ഞു: സഹദ് എന്നവരേ.. നിങ്ങൾ നിങ്ങളുടെ ഭക്ഷണം ത്വയ്യിബ് ആക്കുക നിങ്ങളുടെ ദുആകൾക്ക് ഉത്തരം കിട്ടും.ആരെങ്കിലും ഹറാം ആയ ഭക്ഷണം കഴിച്ചാൽ അവന്റെ അടുക്കൽ നിന്ന് 40 ദിവസത്തേക്ക് അള്ളാഹു ഒന്നും തന്നെ സ്വീകരിക്കുകയില്ല. ആരെങ്കിലും പലിശയോ അന്യായമായി കൈവശപ്പെടുത്തിയതോ ഭക്ഷിച്ചാൽ നരകം അവനോട് ഏറ്റവും ബന്ധപ്പെട്ടതാണ്.

മേൽപറഞ്ഞ ആയത്തിൽ നിന്നും രണ്ടു കാര്യങ്ങൾ വ്യക്തമാണ്.ഒന്ന് ത്വയ്യിബ് അല്ലാത്തതും ഹലാൽ അല്ലാത്തതും കഴിച്ചാൽ 40 ദിവസത്തേക്ക് അവനിൽ നിന്നും അള്ളാഹു ഒന്നും സ്വീകരിക്കുകയില്ല. രണ്ട് അത് കാരണം ഹറാമായ പ്രവർത്തനങ്ങൾ അവനിൽ നിന്ന് വരികയും ചെയ്യും.അത് കൊണ്ട് ഭക്ഷണം ഹലാലും ത്വയ്യിബുമാക്കി സൂക്ഷിക്കേണ്ടത് അനിവാര്യമാണ്. സൂറത്തുൽ ബഖറയിൽ അള്ളാഹു ആദ്യം തൗഹീദിനെ പറ്റിയും പിന്നീട് നുബുവ്വത്തിനെ പറ്റിയും പിന്നീട് ജൂതരേയും ക്രിസ്ത്യാനികളെ പറ്റിയും പറഞ്ഞ ശേഷം ഭക്ഷണ കാര്യത്തെ പറ്റി പറഞ്ഞത് അതിന്റെ ഗൗരവം ഊഹിക്കാൻ സഹായകമാണ്.

- {وَكُلُوا مِمَّا رَزَقَكُمُ اللَّهُ حَلَالًا طَيِّبًا وَاتَّقُوا اللَّهَ الَّذِي أَنْتُمْ بِهِ مُؤْمِنُونَ} المائدة/88.

അല്ലാഹു നിങ്ങള്‍ക്ക് നല്‍കിയതില്‍ നിന്ന് ഹലാലും ത്വയ്യിബുമായത് നിങ്ങള്‍ തിന്നുകൊള്ളുക. ഏതൊരുവനിലാണോ നിങ്ങള്‍ വിശ്വസിക്കുന്നത് ആ അല്ലാഹുവിനെ നിങ്ങള്‍ സൂക്ഷിക്കുകയും ചെയ്യുക.

- {فَكُلُوا مِمَّا غَنِمْتُمْ حَلَالًا طَيِّبًا وَاتَّقُوا اللَّهَ إِنَّ اللَّهَ غَفُورٌ رَحِيمٌ}69 الأنفال/6.

എന്നാല്‍ (യുദ്ധത്തിനിടയില്‍) നിങ്ങള്‍ നേടിയെടുത്തതില്‍ നിന്ന് ഹലാലും ത്വയ്യിബുമായത് നിങ്ങള്‍ ഭക്ഷിച്ചു കൊള്ളുക. അല്ലാഹുവെ നിങ്ങള്‍ സൂക്ഷിക്കുകയും ചെയ്യുക. തീര്‍ച്ചയായും അല്ലാഹു ഏറെ പൊറുക്കുന്നവനും കരുണ ചൊരിയുന്നവനുമാകുന്നു.

- {فَكُلُوا مِمَّا رَزَقَكُمُ اللَّهُ حَلَالًا طَيِّبًا وَاشْكُرُوا نِعْمَتَ اللَّهِ إِنْ كُنْتُمْ إِيَّاهُ تَعْبُدُونَ} النحل/114

ആകയാല്‍ അല്ലാഹു നിങ്ങള്‍ക്ക് നല്‍കിയിട്ടുള്ളതില്‍ നിന്ന് ഹലാലും ത്വയ്യിബുമായത് നിങ്ങള്‍ തിന്നുകൊള്ളുക. അല്ലാഹുവിന്‍റെ അനുഗ്രഹത്തിന് നിങ്ങള്‍ നന്ദികാണിക്കുകയും ചെയ്യുക; നിങ്ങള്‍ അവനെയാണ് ആരാധിക്കുന്നതെങ്കില്‍.

عن أبي هُرَيْرَةَ رضي الله عنه قال: قاَل رسُولُ الله صلى الله عليه وسلم: "إنَ الله طَيِّبٌ لا يَقْبَلُ إلا طَيِّبًا

നബിമാരോടാകട്ടെ അള്ളാഹു ത്വയ്യിബ് മാത്രമേ കഴിക്കാവൂ എന്നും നിഷ്‌കർഷിക്കുന്നുണ്ട്. അവരുടെ പ്രതിനിധികൾക്കും അത് ബാധകമാണ്.അവർ സ്വദഖയും കഴിക്കുകയില്ല.

﴿ يا أَيُّها الرُّسُلُ كُلُوا مِنَ الطَّيَّباتِ واعمَلُوا صالحًا ﴾ [المؤمنون: 51]

ഹേ; ദൂതന്‍മാരേ, ത്വയ്യിബായതിൽ നിന്ന് നിങ്ങള്‍ ഭക്ഷിക്കുകയും, സല്‍കര്‍മ്മം പ്രവര്‍ത്തിക്കുകയും ചെയ്യുവിന്‍.

ഉമ്മു അബ്ദില്ലാഹ് എന്നവർ ഒരിക്കൽ ഒരു പാത്രത്തിൽ റസൂലിന് കുറച്ച് പാൽ കൊടുത്തയച്ചു നോമ്പ് തുറ സമയത്ത് കൊടുത്തയച്ചു.റസൂൽ (സ) അവരെ തിരിച്ചയക്കുകയും പാൽ എവിടെ നിന്നാണ് എന്ന് അന്വേഷിച്ചു വരാൻ പറയുകയും ചെയ്തു.വന്ന ആൾ തിരിച്ചു പോയി ഉമ്മു അബ്ദില്ലാഹ് എന്നവരോട് പാൽ എവിടെ നിന്നാണ് എന്ന് അന്വേഷിച്ചു. അവരുടെ സ്വന്തം ആടിൽ നിന്നുള്ള പാൽ ആണെന്ന് അവർ അറിയിച്ചു. വീണ്ടും നബിയുടെ അടുത്തേക്ക് അവർ പാലുമായി ചെന്നു . റസൂൽ (സ) അവരെ വീണ്ടും തിരിച്ചയച്ചു. ആട് ആരുടേതാണ് അല്ലെങ്കിൽ എവിടെ നിന്നാണ് എന്ന് അന്വേഷിച്ചു വരാൻ പറഞ്ഞു.വന്ന ആൾ വീണ്ടും പാലുമായി തിരിച്ച് പോയി.ഉമ്മു അബ്ദില്ലാഹ് സ്വന്തം മുതലിൽ നിന്ന് വാങ്ങിയ ആടാണെന്ന് നബിയെ അറിയിച്ചു. അപ്പോൾ റസൂൽ (സ) ആ പാൽ കുടിച്ചു.റസൂൽ (സ) ഇതിന് കാരണമായി പറഞ്ഞത് എല്ലാ പ്രവാചകരോടും അള്ളാഹു ത്വയ്യിബ് മാത്രം കഴിക്കാനും നല്ല കാര്യങ്ങൾ മാത്രം പ്രവർത്തിക്കാനുമാണ് പറഞ്ഞിട്ടുള്ളത് എന്ന് പറഞ്ഞു.

നമുക്ക് ലഭിക്കുന്ന ഭക്ഷണം എവിടെ നിന്ന് വരുന്നു, ആരിൽ നിന്ന് വരുന്നു എന്ന് അന്വേഷിക്കുന്നത് നബി ചര്യയും ഭക്ഷണം ത്വയ്യിബ് ആകാനുമുള്ള രീതി ആണ്.മാത്രമല്ല റസൂൽ (സ) അല്ലാഹുവേ, എന്നെ ത്വയ്യിബായത് ഭക്ഷിപ്പിക്കുകയും സത്കർമ്മങ്ങളിൽ വ്യാപൃതനാക്കുകയും ചെയ്യേണമേ എന്ന് ദുആ ചെയ്തിരുന്നു.

: قال رسول الله صلى الله عليه وسلم "ما جاءني جبريل إلا أمرني بهاتين الدعوتين. اللهم ارزقني طيباً، واستعملني صالحاً" .

ഭക്ഷണം ത്വയ്യിബ് ആക്കിയ ചരിത്രങ്ങൾ

ഒരിക്കൽ സിദ്ധീഖ് (റ) ഒരു പരിചാരകൻ സിദ്ധീഖ് (റ) ഭക്ഷണം ഒരുക്കി.ഭക്ഷണം കഴിച്ചു കഴിഞ്ഞപ്പോൾ പരിചാരകൻ പറഞ്ഞു:"ജാഹിലിയ്യാ കാലത്ത് ഞാൻ ഭാവി പ്രവചിച്ച് വരുമാനം നേടിയിരുന്നു.ആ വരുമാനം ഞാൻ എടുത്തു വെച്ച് അത് കൊണ്ടാണ് ഇപ്പോൾ നിങ്ങൾക്ക് ഭക്ഷണം നൽകിയത്." പരിചാരകൻ മുസ്ലിം ആയിരുന്നു. പക്ഷെ മുസ്ലിം ആകും മുമ്പാണ് ഈ ജോലി ചെയ്തിരുന്നത്. അതിനാൽ പ്രത്യക്ഷത്തിൽ അതൊരു ഹരായ ഭക്ഷണം അല്ല. എന്നാൽ സിദ്ധീഖ് (റ) കൈകൾ വായുടെ ഉള്ളിൽ ഇട്ട് ഉണ്ടാക്കി ഛർദിച്ചു ആ ഭക്ഷണം പുറത്തു കളഞ്ഞു.

ശൈഖ് അബ്ദുൽ ഖാദിർ ജീലാനി തങ്ങളുടെ പിതാവിന് പുഴയിൽ നിന്ന് ഒരു പഴം കിട്ടി. വീണ് കിട്ടിയതിനാലും ഉടമ അത് അന്വേഷിച്ച് വരാൻ സാധ്യത ഇല്ലാത്തതിനാലും എ പഴം കഴിക്കൽ ഹലാലാണ്. എന്നാൽ പഴം കഴിച്ച ശേഷം ത്വയ്യിബിന്റെ ചിന്ത വരികയും ഉടമയെ തേടി കണ്ടു പിടിച്ചു വര്ഷങ്ങളോളം ആ പഴത്തിന് വേണ്ടി ഉടമയുടെ കീഴിൽ ജോലി ചെയ്യുകയും ചെയ്തു.

ശൈഖ് അബ്ദുൽ ഖാദിർ ജീലാനി തങ്ങൾ തന്റെ ആത്മീയ യാത്രയ്ക്കിടയിൽ ദിവസങ്ങളോളം ഭക്ഷണം കഴിക്കാതെയിരുന്നു.അങ്ങനെ വിശപ്പ് അസഹനീമായപ്പോൾ ആളുകൾ ഉപേക്ഷിച്ച് പോയ ഒരു ഭക്ഷണ പൊതി കണ്ടു.ഉപേക്ഷിച്ച് പോയതിനാൽ അതിൽ നിന്ന് കഴിക്കൽ ഹലാലാകും.അങ്ങനെ കഴിക്കാൻ പോയ അവസരത്തിൽ ഒരശരീരി കേട്ടു :"അല്ലാഹുവിലേക്ക് മുന്നിട്ട് പോകുന്ന മനുഷ്യാ ..ഭക്ഷണത്തിനോട് ഇത്ര ആർത്തിയോ?". ശൈഖ് അബ്ദുൽ ഖാദിർ ജീലാനി ആ ഭക്ഷണം കഴിച്ചില്ല.

ഗുണം കുടി മസ്താൻ അധികവും കഴിച്ചിരുന്നത് ഉണങ്ങി വീണ ഇലകൾ ആയിരുന്നു.

ശൈഖ് മുഹമ്മദ് ബാവ ഉസ്താദ് ഒരിക്കൽ തന്റെ ശൈഖിന്റെ അടുത്ത് പോയപ്പോൾ ശൈഖ് എല്ലാവരോടും ഒരു ചോദ്യം ചോദിച്ചു. ഒരാൾ പട്ടിണി മൂലം മറിക്കാൻ പോകുകയാണ്.അയാൾക്കപ്പോൾ ഹറാമായ കുറച്ച് ഭക്ഷണം കിട്ടി. അയാൾക്കത് കഴിക്കാമോ? എല്ലവരും കഴിക്കാൻ പറ്റുമെന്ന് പറഞ്ഞപ്പോൾ കഴിക്കാതെ മരിക്കുകയാണെന്ന് നല്ലത് എന്ന് ശൈഖ് മുഹമ്മദ് ബാവ ഉസ്താദ് അഭിപ്രായപ്പെട്ടു. അവിടത്തെ ശൈഖ് ആ അഭിപ്രായം ശരി വെക്കുകയും ചെയ്തു.