ഇമാം ജഅ്ഫറു ബ്നു മുഹമ്മദ്‌ അൽ സാദിഖ് (റ)

 സയ്യിദുനാ ഇമാം അബൂ അബ്‌ദില്ലാഹ് ജഅഫറു ബ്നു മുഹമ്മദ്‌ അൽ സാദിഖ് (റ).

മുത്തുനബിയുടെ കരളിന്റെ കഷണമായ ഹുസൈനാർ തങ്ങളുടെ പുകൾ പെറ്റ പേര സന്തതി. അപരനാമങ്ങൾ പലതുണ്ടായിരുന്നു. സത്യസന്ധൻ എന്നർത്ഥം വരുന്ന അൽ സാദിഖ് എന്ന പേരാണ് ഏറ്റവും പ്രഖ്യാതമായതു. തിരുനബിക്കും ആ പേരുണ്ടായിരുന്നു. സാദിഖ് അൽ അമീൻ എന്നാണ് തിരുനബി(സ) വിളിക്കപ്പെട്ടത്.

മഹാനാവർകളുടെ ജനനം ഹിജ്‌റ വർഷം എൺപതിലെ റബീഉൽ അവൽ മാസത്തിൽ. അല്ലാഹുവിലേക്കു യാത്രയായത് ഹിജ്‌റ 148 ലെ ഷവാൽ മാസത്തിൽ. മുത്തുരത്നങ്ങളായ പിതാവിനോടും പിതാമഹനോടും കൂടെ പരിശുദ്ധ മദീനയിലെ ജന്നത്തുൽ ബഖീഇൽ അന്ത്യ വിശ്രമ സ്ഥാനം.

അവിടന്ന് ജ്ഞാനത്തിന്റെ മഹാസമുദ്രം തന്നെയാണ്. എല്ലാ വിഭാഗക്കാരുടെയും അറിവിന്റെ വഴികൾ കടന്നു പോകുന്നത് മഹാനാവർകളിലൂടെയാണ്. മുൻകാലക്കാരുടെയും പിൻകാലക്കാരുടെയും ജ്ഞാന മാർഗങ്ങൾ മഹാനവർകളിൽ ഒത്തൊരുമിച്ചു.

ഇമാം അബൂ ഹനീഫ (റ) യോട് ചോദിക്കപ്പെട്ടു. "നിങ്ങൾ കണ്ടതിൽ വച്ചു ഏറ്റവും അറിവുള്ള വ്യക്തി ആരായിരുന്നു?. അവരുടെ മറുപടി ഇതായിരുന്നു. "സയ്യിദുനാ ജഅഫർ ബ്നു മുഹമ്മദ്‌ (റ ) എന്നവരേക്കാൾ അറിവുള്ളവരായി മറ്റാരെയും ഞാൻ കണ്ടിട്ടില്ല".

ഇമാം മാലിക് ബ്നു അനസ് (റ) പറയുന്നു.

" സയ്യിദുനാ ജഅഫർ ബ്നു മുഹമ്മദ്‌ (റ) എന്നവരേക്കാൾ അറിവിനാലും സൂക്ഷ്മതയാലും ശ്രേഷ്ഠതയാലും ഉത്തമരായി മറ്റാരെയും എന്റെ ഈ കണ്ണുകൾ കണ്ടിട്ടില്ല. മൂന്നു കാര്യങ്ങളിൽ നിന്ന് ഒരിക്കലും മഹാനവർകൾ ഒഴിവായിരുന്നില്ല. ഒന്നുകിൽ നോമ്പുകാരൻ. അല്ലെങ്കിൽ നിന്ന് നമസ്കരിക്കുക. അല്ലെങ്കിൽ ദിക്റിൽ മുഴുകുക. ഇവയിൽ നിന്ന് ഒഴിവായിരുന്നില്ല "

ഖലീഫ അബൂ ജാഫറുൽ മൻസൂറിന്റെ കാലഘട്ടമായിരുന്നു. ഖലീഫ മഹാനവർകൾക്ക് കത്തയച്ചു. "മറ്റു ജനങ്ങൾ കാണാൻ വരുന്ന പോലെ നിങ്ങൾ എന്തുകൊണ്ട് എന്നെ കാണാൻ വരുന്നില്ല" അതിനുള്ള പ്രതിവചനം ഇങ്ങനെയായിരുന്നു. "ഈ ദുനിയാവിൽ ഞങ്ങൾ ഭയപ്പെടാൻ മാത്രം നിങ്ങളിൽ ഒന്നും തന്നെയില്ല. ഞങ്ങളുടെ ആഖിറത്തിനു വേണ്ടി പ്രത്യാശിക്കാൻ നിങ്ങളിൽ നിന്ന് ഒന്നും കിട്ടാനുമില്ല. അഭിനന്ദനങ്ങൾ അർപ്പിക്കാൻ മാത്രം ഒരു അനുഗ്രഹവും നിങ്ങളുടെ കയ്യിലില്ല.ആശ്വസിപ്പിക്കാൻ മാത്രം നിങ്ങൾ ഒരു ആപത്തിലും പെട്ടിട്ടില്ല. പിന്നെന്തിനാണ് കാണാൻ വരുന്നത് ".

മഹാനാവർകളുടെ സദുപദേശങ്ങൾ കോർത്തിണക്കിയ ഗ്രന്ഥങ്ങൾ അഹ്ലു സുന്നതിന്റെതായി തന്നെ ധാരാളമുണ്ട്.

സയ്യിദുനാ ജഅഫർ സ്വാദിഖ് (റ ) പറയുന്നു

" ഭയഭക്തിയേക്കാൾ ഉൽകൃഷ്ടമായൊരു പാഥേയം വേറെയില്ല. മൗനത്തേക്കാൾ ഉത്തമമായ കാര്യം വേറെയില്ല. അജ്ഞതയെക്കാൾ ഉപദ്രവകാരിയായ ശത്രു വേറെയില്ല. കളവിനെക്കാൾ ആതുരമായൊരു രോഗം വേറെയില്ല"