മരണത്തിന്റെ മാലാഖ

(മൌലാനാ ജലാലുദ്ധീൻ റൂമിയുടെ ചിരപ്രശസ്തമായ മസ്നവിയെ മഅനവിയിൽ നിന്നും എടുത്ത കഥകൾ)

ലോകം ഭരിച്ച അധിപതിയായിരുന്നു സയ്യിദനാ സുലൈമാൻ നബി(അ ). അതിബുദ്ധിശാലിയും പ്രഗത്ഭമതിയും ആയിരുന്നു അവർ. നിത്യവും തന്റെ പ്രജകളുടെ ആവലാതികൾ കേൾക്കുകയും അതിനു പരിഹാരങ്ങൾ നിർദ്ദേശിക്കുകയും അദ്ദേഹത്തിന്റെ ദർബാറിലെ ഒരു പതിവായിയുന്നു.

ഒരുദിനം പതിവുപോലെ പ്രജാവത്സലനായി പരിഭവങ്ങൾ ഒന്നൊന്നായി കേട്ടുകൊണ്ടിരിക്കികയായിരുന്നു മഹാനവർകൾ. അപ്പോഴതാ അങ്ങേയറ്റം ക്ഷീണിതനായ ഒരു മധ്യവയസ്കൻ തന്റെ ദർബാറിന്റെ നടുവിൽ വന്നു വീണു. പെട്ടെന്ന് തന്നെ വരിയിൽ നിൽക്കുന്നവരോട് ക്ഷമിക്കാൻ പറഞ്ഞു അദ്ദേഹത്തെ മുന്നിലേക്ക്‌ വരുത്തി. “എന്താണ് നിങ്ങളുടെ പ്രശ്നം. നിങ്ങളെ ഇത്രയും പീഡിതനാക്കിയ കാര്യം എന്താണ്” നബി ആരാഞ്ഞു.

ആ മനുഷ്യൻ ഇങ്ങനെ പ്രതിവചിച്ചു. “ഞാൻ ഇവിടത്തെ ഒന്ന് കാണാൻ വേണ്ടി വരുകയായിരുന്നു. പുറത്തു വച്ചു യാദൃശ്ചികമായി മരണത്തിന്റെ മാലാഖയുമായി മുഖാമുഖം ദർശിച്ചു. അവർ എന്നെ ഞെട്ടിപ്പിക്കുന്ന ഒരു നോട്ടം നോക്കി. ഞാനാകെ ഉരുകിപ്പോയി. എന്റെ ഹൃദയം സ്തംഭിച്ചു പോയി മഹാനാവർകളെ”

“മലക്ക് അസ്രായീൽ കല്പന സ്വീകരിക്കുന്നത് അല്ലാഹുവിൽ നിന്ന് നേരിട്ടാണെന്നു നിനക്ക് അറിയില്ലേ. അദ്ദേഹം തന്റെ കർത്തവ്യത്തിൽ ഒരിക്കലും ഭംഗം വരുത്താത്ത ആളാണ്. അതിരിക്കട്ടെ. നമ്മൾ എന്താണ് ഇപ്പോൾ ചെയ്തു തരേണ്ടത്”. നബി ഇപ്രകാരം മൊഴിഞ്ഞു.

ഇത് കേട്ടതും പരാതിക്കാരൻ ബോധിപ്പിച്ചു “അങ്ങേക്ക് അള്ളാഹു കാറ്റിനെയും വെളിച്ചത്തെയും എല്ലാം കീഴടക്കി തന്നിട്ടില്ലേ. കിഴക്കൻ കാറ്റിനോട് ഒന്ന് പറയണം. എത്രയും പെട്ടെന്ന് എന്നെ ഇന്ത്യയുടെ ഭൂമിയിലേക്ക് എത്തിക്കണം. അവിടെ ആവുമ്പോൾ മരണത്തിന്റെ മാലാഖ എന്നെ തേടി വരില്ല”.

ഇതുകേട്ടതും മഹാനാവർകൾ അദ്ദേഹത്തിന്റെ ആഗ്രഹം നിവർത്തിച്ചു കൊടുത്തു. കിഴക്കൻ കാറ്റു ഉടൻ തന്നെ അദ്ദേഹത്തെയും കൊണ്ട് ഇന്ത്യയിലേക്ക് പോയി.

അങ്ങനെയിരിക്കെ അന്ന് സന്ധ്യാനേരത്തെ സദസ്സിൽ വച്ചു സയ്യിദനാ സുലൈമാൻ(അ) മലക്ക് അസ്രായേലിനെ കാണാനിടയായി. മഹാനാവർകൾ മലക്കിനെ അടുത്തേക്ക് വിളിച്ചു. “എന്താണ് നിങ്ങൾ ആളുകളെ നോക്കി പേടിപ്പിക്കുന്നത്. നിങ്ങളുടെ നോട്ടം പതിഞ്ഞു ഞെട്ടിയതിനാൽ ഇന്ന് ഒരാളെ എനിക്ക് അങ്ങ് ദൂരെ ഇന്ത്യയിലേക്ക് എത്തിക്കേണ്ടി വന്നു”. നബി ആരാഞ്ഞു. ഇത് കേട്ടു ഒരു മന്ദസ്മിതത്തോടെ മരണത്തിന്റെ മാലാഖ പ്രതിവചിച്ചു “നബിയെ, എനിക്ക് അല്ലാഹുവിന്റെ കല്പനയുണ്ടായിരുന്നു. ഇന്ന് തന്നെ ഇന്ത്യയിൽ വച്ചു അദ്ദേഹത്തിന്റെ ആത്മാവ് പിടിച്ചു വരണം. അതിനാൽ പേടിപ്പിക്കാനല്ല ഞാൻ നോക്കിയത്. അത്ഭുതം കൊണ്ടാണ്. അദ്ദേഹത്തിന് ഒരായിരം ചിറകുകൾ ഉണ്ടെങ്കിൽ പോലും ഒറ്റ ദിവസം കൊണ്ട് ഇന്ത്യയിൽ എങ്ങനെ എത്തും എന്നാണ് ഞാൻ അത്ഭുതപ്പെട്ടത്. എന്നാൽ അല്ലാഹുവിന്റെ വിധി ഇതാ നടപ്പായിക്കഴിഞ്ഞു” ഇത് കേട്ടു നബിയും പുഞ്ചിരി തൂകി.

സാരാംശം :

ജീവനിൽ അതിയായ ആസക്തിയും അഭിവാഞ്ചയും നിനക്ക് ഉണ്ടായിരിക്കാം. എന്നാൽ തമ്പുരാന്റെ അലംഘനീയ വിധിയെ തടയാൻ ഒരു ശക്തി കൊണ്ടും സാധ്യമല്ല. അനിർവചനീയവും അപ്രതീക്ഷിതവുമായി വഴികളിലൂടെ അത് നിന്നെ തേടിയെത്തും.