ശൈഖ് മുഹ്‌യുദ്ധീൻ അബ്ദുൽ ഖാദിർ ജീലാനി(റ): തൗഹീദീജ്ഞാനത്തിന്റെ വിശുദ്ധ വെളിച്ചം

സർവ്വ ലോകരുടെയും ലോകങ്ങളുടെയും സ്രഷ്ടാവായ അല്ലാഹുവിലേക്കുള്ള യാത്രയിൽ, ഓരോ വിശ്വാസിക്കും അനിവാര്യമായ ആത്മജ്ഞാനത്തിൻ്റെ (മഅ്‌രിഫത്ത്) വെളിച്ചം പകരുകയും, സത്യത്തിൻ്റെ പാതയിൽ മാർഗ്ഗദർശനം നൽകുകയും ചെയ്ത മഹാനായ ആത്മ ജ്ഞാനിയാണ് ശൈഖ് മുഹ്‌യിദ്ദീൻ അബ്ദുൽ ഖാദിർ ജീലാനി (റ). കാലത്തിൻ്റെ തിരശ്ശീലയിൽ നിന്നും മറഞ്ഞാലും, അവിടുത്തെ ഉപദേശങ്ങൾ ഇന്നും എന്നും ലക്ഷോപലക്ഷം വിശ്വാസികളുടെ ഹൃദയങ്ങളിൽ അനന്ത കാലം അണയാത്ത പ്രകാശഗോപുരമായി നിലനിൽക്കുന്നു.

ആത്മജ്ഞാനമാണ് വിശ്വാസിയുടെ ആത്മാവിൻ്റെ ദാഹം ശമിപ്പിക്കുന്നത്. ഒരു വിശ്വാസിയുടെ ജീവിതം, കേവലം ബാഹ്യമായ ആരാധനകളിൽ മാത്രം ഒതുങ്ങേണ്ട ഒന്നല്ല. നിസ്കാരം, നോമ്പ്, സക്കാത്ത്, ഹജ്ജ് തുടങ്ങിയ കർമ്മങ്ങൾ ഇസ്ലാമിൻ്റെ തൂണുകളാണെങ്കിലും, അതിലൂടെ തേടേണ്ട ആത്യന്തിക ലക്ഷ്യം, സ്രഷ്ടാവിനെക്കുറിച്ചുള്ള അറിവും അവനുമായുള്ള ആഴമേറിയ ബന്ധവുമാണ്. ഇതാണ് പ്രഥമ കർമമായ ശഹാദത്തിന്റെ ലക്ഷ്യവും ഉദ്ദേശ്യവും. ഈ ബന്ധമാണ്, ഈ ശഹാദത്താണ് യഥാർത്ഥത്തിൽ ആത്മജ്ഞാനം അഥവാ മഅ്‌രിഫത്ത്.

അല്ലാഹുവിൻ്റെ സത്തയെയും സിഫാത്തുകളെയും (ഗുണവിശേഷങ്ങൾ) അഫ്ആലുകളെയും (പ്രവർത്തനങ്ങൾ) കുറിച്ചുള്ള, ഹൃദയത്തിൽ ഉറച്ച, സഫലമായ തിരിച്ചറിവാണത്. അല്ലാഹു എന്ന സാക്ഷിത്വത്തിന്റെ സാക്ഷാൽക്കരമാണത്. ഈ അറിവ് നേടുമ്പോളാണ് ആരാധനകൾക്ക് ജീവൻ വെക്കുന്നത്. ഭൗതികമായ മായാലോകത്തിൻ്റെ കെട്ടുപാടുകളിൽ നിന്നും ആത്മാവ് മോചനം നേടുന്നത് അപ്പോൾ മാത്രമാണ്. ആത്മജ്ഞാനമില്ലാത്ത ആരാധന, പ്രകാശമില്ലാതെ മുനിഞ്ഞു കത്തുന്ന വിളക്ക് പോലെയാണ്; അത് തീർച്ചയായും കത്തിനിൽക്കുന്നുണ്ടാവാം, പക്ഷേ ലക്ഷ്യസ്ഥാനത്തേക്ക് വെളിച്ചം നൽകാൻ അതിന് സാധിക്കുകയില്ല.

ഒരു വിശ്വാസിയെ സംബന്ധിച്ചിടത്തോളം, ആത്മജ്ഞാനം എന്നത് വെറുമൊരു അലങ്കാരമല്ല, മറിച്ച് ആവശ്യകതയും അനിവാര്യതയുമാണ്. അല്ലാഹുവിനെ യഥാവിധി അറിയാതെ, അവനിലേക്ക് തിരിയുവാനോ, അവനെ ഭയപ്പെടാനോ, അവനിൽ ആശ്രയിക്കുവാനോ ആവില്ല. ഈ അജ്ഞാനം മനുഷ്യനെ സ്വന്തം നഫ്‌സിൻ്റെ (അഹംഭാവം) പിടിയിലും ലൗകിക മോഹങ്ങളുടെ ചങ്ങലകളിലും തളച്ചിടുന്നു. അതിനാൽ, ആത്മജ്ഞാനം അഥവാ മഅ്‌രിഫത്ത് നേടുക എന്നത് വിശ്വാസിയുടെ അനിവാര്യമായ ആത്മീയ യാത്രയാണ്.

ഈയൊരു ചിന്താ മണ്ഡലത്തിലാണ് ശൈഖ് ജീലാനി (റ) മാർഗ്ഗദർശനത്തിൻ്റെ സൂര്യതേജസ്സായി മാറുന്നത്. ആത്മജ്ഞാനത്തിൻ്റെ കൊടുമുടിയിലേക്ക് കയറാൻ വെമ്പുന്നവർക്ക്, ശൈഖ് ജീലാനി (റ) യുടെ ജീവിതവും ഉപദേശങ്ങളും ഒരു സ്വർണ്ണസൂചിക പോലെ നിലകൊള്ളുന്നു. അവിടുന്ന് വെറുമൊരു പണ്ഡിതനോ ശൈഖോ അല്ല, മറിച്ച് ശരീഅത്തിൻ്റെയും ത്വരീഖത്തിൻ്റെയും ഹഖീഖത്തിൻ്റെയും പൂർണ്ണമായ രൂപമായിരുന്നു.

ശൈഖ് ജീലാനി (റ)യുടെ മാർഗ്ഗം, കേവലം അടഞ്ഞ സന്യാസത്തിലേക്കോ ലൗകിക വിരക്തിയിലേക്കോ ഉള്ള ഒളിച്ചോട്ടമായിരുന്നില്ല. പകരം, തിരു നബി ﷺ യുടെ ചര്യ മുറുകെ പിടിച്ച്, ശരീഅത്തിൻ്റെ നിയമങ്ങൾ കൃത്യമായി പാലിച്ചുകൊണ്ട്, ഹൃദയത്തെ ശുദ്ധീകരിക്കുവാനുള്ള ഒരു പരിശീലനക്കളരിയായിരുന്നു. സയ്യിദുനാ മുഹമ്മദ് റസൂലുല്ലാഹി(സ) എന്ന തൗഹീദിന്റെ ജീവൽ സ്വരൂപമായ ശഹാദത്തിന്റെ യാഥാർഥ്യത്തെ പരിപൂർണ്ണമായി പുനര്ജീവിപ്പിക്കുകയായിരുന്നു അവിടുത്തെ ജീവിത നിയോഗം. അങ്ങനെയാണ് മരിച്ച ദീനിനെ പുരുജ്ജീവിപ്പിച്ചു മനുഷ്യകത്തിനു മഹാ സഹായമായി മാറി അവിടുന്ന് ഗൗസുൽ അഅസമും മുഹ്‌യുദ്ധീനുമായി മാറിയത്.

അവിടുത്തെ ഉപദേശങ്ങളിൽ മുഖ്യമായിരുന്ന ചിലതിങ്ങനെയാണ്,

നിഷ്കളങ്കമായ തൗഹീദ്: അല്ലാഹുവിൽ മാത്രം അഭയം തേടുക, അവനല്ലാത്ത ഒന്നിനും ശക്തിയില്ലെന്ന് ഉറച്ചു വിശ്വസിക്കുക. ആ യാഥാർഥ്യത്തിലേക്ക് ചേർന്നു നിൽക്കാനുള്ള മാർഗങ്ങൾ അവലമ്പിക്കുക.

ഹൃദയശുദ്ധി (തസ്കിയത്തുൽ നഫ്‌സ്): അസൂയ, അഹങ്കാരം, ധനം, പദവി, പ്രശസ്തി എന്നിവയോടുള്ള ആർത്തി പോലുള്ള ദുർഗുണങ്ങളിൽ നിന്ന് ഹൃദയത്തെ കഴുകിക്കളയുക.

സത്യസന്ധതയും വിനയവും: എല്ലാ കാര്യങ്ങളിലും സത്യം മാത്രം പറയുക, സ്വയം ചെറുതാകുകയും അല്ലാഹുവിൻ്റെ മുന്നിൽ സമ്പൂർണ്ണമായി വിനയം കാണിക്കുകയും ചെയ്യുക.

ഇബാദത്തിലെ ഇഖ്‌ലാസ്: എല്ലാ ആരാധനകളും അല്ലാഹുവിൻ്റെ പ്രീതി മാത്രം ലക്ഷ്യമാക്കി, മറ്റൊന്നിനെയും ആശ്രയിക്കാതെ ചെയ്യുക.

ശൈഖവർകൾ വിശ്വാസികളെ പഠിപ്പിച്ചത്, സത്യം തേടുന്നവൻ ആദ്യം സ്വന്തം ഉള്ളിലേക്ക് നോക്കണമെന്നാണ്. നമ്മുടെ ഉള്ളിൽ കുടികൊള്ളുന്ന നഫ്‌സിൻ്റെ ദുർബലതകളെ തിരിച്ചറിഞ്ഞ്, അവയെ മുജാഹദത്ത് (ആത്മസമ്പ്രദായം) എന്ന കഠിനമായ പ്രയത്നം കൊണ്ട് മെരുക്കിയെടുക്കണം. ഈ ആത്മീയ ശുദ്ധീകരണ പ്രക്രിയയാണ് ആത്മജ്ഞാനത്തിലേക്കുള്ള പാലം.

ആത്മജ്ഞാനം എന്ന സ്വർഗ്ഗീയാനുഭൂതി നേടാൻ, ശൈഖ് ജീലാനി (റ) യെ പിന്തുടരുന്നത് അത്യധികം പ്രാധാന്യം അർഹിക്കുന്നു. കാരണം അതാണ് സമഗ്രതയുടെ പാത. അവിടുത്തെ പാത, ഇസ്‌ലാമിൻ്റെ ബാഹ്യനിയമങ്ങളെയും (ശരീഅത്ത്) ആന്തരിക സത്യങ്ങളെയും (ഹഖീഖത്ത്) സമന്വയിപ്പിക്കുന്നു. ഒന്നിനെ ഒഴിവാക്കി മറ്റൊന്നിനെ മാത്രം പിന്തുടർന്നാൽ സഞ്ചാരം അപൂർണ്ണമാകും.

അവിടുന്നാണ് യഥാർത്ഥ മാതൃക. അവിടുത്തെ ജീവിതം ഖുർആനും സുന്നത്തും അക്ഷരംപ്രതി പകർത്തി തിരുനബി(സ) യുടെ മറ്റൊരു ജീവിക്കുന്ന മാതൃകയായിരുന്നു. ഉപദേശങ്ങൾ കേവലം വാക്കുകളായിരുന്നില്ല, മറിച്ച് ജീവിതത്തിൽ അനുഭവിച്ചറിഞ്ഞ യാഥാർത്ഥ്യങ്ങളായിരുന്നു.

അവിടുത്തെ ആത്മീയ ചൈതന്യം അന്ത്യ നാൾ വരെ ലക്ഷക്കണക്കിന് ആളുകൾക്ക് ആന്തരികവും മഹോന്നതവുമായ ശോഭയും പ്രകാശവും നൽകിക്കൊണ്ടിരിക്കുന്നു. അവിടുത്തെ ഖലീഫമാർ, ഗുരു-ശിഷ്യ ബന്ധത്തിലൂടെ, തൗഹീദിന്റെ സാക്ഷിത്വവും ആത്മീയമായ അറിവുകളും കൈമാറി, അവരുടെ ഹൃദയങ്ങളിൽ സത്യത്തിൻ്റെ വിത്തുകൾ പാകുന്നു.

അതുകൊണ്ട്, ആത്മജ്ഞാനത്തിൻ്റെ പവിത്രമായ അമൃത് നുകരുവാൻ ആഗ്രഹിക്കുന്ന ഓരോ വിശ്വാസിയും, സയ്യിദുനാ ശൈഖ് മുഹ്‌യുദ്ധീൻ അബ്ദുൽ ഖാദിർ ജീലാനി(റ) യുടെ ഉപദേശങ്ങളുടെ വെളിച്ചവും മാർഗ്ഗദർശനത്തിൻ്റെ കരുത്തും തൻ്റെ ജീവിതത്തിൽ സ്വീകരിക്കേണ്ടതുണ്ട്. അവിടുത്തെ പാത പിന്തുടരുമ്പോൾ, ലൗകികതയുടെ ഇരുളിൽ നിന്നും മഅ്‌രിഫത്തിൻ്റെ പ്രകാശത്തിലേക്ക് ഓരോ വിശ്വാസിക്കും യാത്ര ചെയ്യാനാകും. അത് തന്നെയാണ് അനശ്വരതയിലേക്കുള്ള ഏറ്റവും ഉചിതമായ മാർഗ്ഗം.

ആ വിശുദ്ധ പാതയിലെ അനുഗ്രഹീത വെളിച്ചമാണ് ശൈഖ് മുഹമ്മദ് ബാവ ഉസ്താദ്. അവിടുന്ന് ക്ഷണിക്കുന്നതും നയിക്കുന്നതും സയ്യിദുനാ ശൈഖ് മുഹ്‌യുദ്ധീൻ അബ്ദുൽ ഖാദിർ ജീലാനി(റ) യിലേക്ക് തന്നെയാണ്.