ഔഫ് ബിൻ അൽ ഹാരിസ് (عوف بن الحارث) (റ), മുഅവ്വിദ് ബിൻ അൽ ഹാരിസ് (معوذ بن الحارث) (റ)

ബദ്ർ ശുഹദാക്കൾ 13 &14 :

ഇസ്‌ലാമിക ചരിത്രത്തിലെ ആദരണീയരായ സഹോദരന്മാരാണ് ഔഫ് ബിൻ അൽ ഹാരിസ് (عوف بن الحارث) (റ), മുഅവ്വിദ് ബിൻ അൽ ഹാരിസ് (معوذ بن الحارث) (റ), മുആദ് ബിൻ അൽ ഹാരിസ് (معاذ بن الحارث) (റ). ഇവർ ചരിത്രത്തിൽ അറിയപ്പെടുന്നത് 'അഫ്റാഇന്റെ മക്കൾ' (أبناء عفراء - അബ്നാഉ അഫ്റാഅ്) എന്നാണ്.

വംശാവലിയും വേരുകളും

മദീനയിലെ ഖസ്റജ് (خزرج) ഗോത്രത്തിലെ ബനൂ നജ്ജാർ (بنو نجار) ശാഖയിലാണ് ഇവർ ജനിച്ചത്. ഇവരുടെ പിതാവ് ഹാരിസ് ബിൻ റിഫാഅ (الحارث بن رفاعة) (റ)-യും മാതാവ് അഫ്റാ ബിൻത് ഉബൈദ് (عفراء بنت عبيد) (റ)-യുമാണ്. പിതാവിനേക്കാൾ കൂടുതൽ മാതാവിന്റെ പേരിലാണ് ഈ മൂന്ന് സഹോദരങ്ങൾ ചരിത്രത്തിൽ സ്മരിക്കപ്പെടുന്നത്.

ഈ ഗോത്രത്തിന് പ്രവാചകൻ ﷺ യുമായി പ്രത്യേകമായ ഒരു രക്തബന്ധമുണ്ട്. പ്രവാചകൻ ﷺ ന്റെ പിതാവ് അബ്ദുല്ലാഹ് ബിൻ അബ്ദുൽ മുത്തലിബ് (عبد الله بن عبد المطلب) (റ) യുടെ മാതാവ് ബനൂ നജ്ജാർ ഗോത്രത്തിൽപ്പെട്ട സൽമാ ബിൻത് അമ്ര് (سلمى بنت عمرو) ആയിരുന്നു. അതിനാൽ, ബനൂ നജ്ജാർ ഗോത്രക്കാർ പ്രവാചകൻ ﷺ ന്റെ മാതൃബന്ധുക്കളായി കണക്കാക്കപ്പെടുന്നു.

ഇസ്‌ലാമിന്റെ ആഗമനവും വിശ്വാസവും

മദീനയിൽ ഇസ്‌ലാം പ്രചരിപ്പിക്കാൻ പ്രവാചകൻ ﷺ അയച്ച മുസ്അബ് ബിൻ ഉമൈർ (مصعب بن عمير) (റ) നടത്തിയ പ്രബോധനങ്ങളിലൂടെ അൻസാരികൾക്കിടയിൽ ഇസ്‌ലാം വളരെ വേഗത്തിൽ വ്യാപിച്ചു. ആ വിശ്വാസത്തിന്റെ പുതുവസന്തം മദീനയുടെ ഓരോ കോണിലും പടർന്നപ്പോൾ, ഹൃദയം തുറന്ന അൻസാരികളിൽ ഈ സഹോദരന്മാരും ഉണ്ടായിരുന്നു. സത്യം തിരിച്ചറിഞ്ഞ നിമിഷം മുതൽ അവർ ഇസ്‌ലാമിന്റെ അടിയുറച്ച അനുയായികളായി മാറി.. അവർ വെറുമൊരു ഗോത്രത്തിന്റെയോ വംശത്തിന്റെയോ പ്രതിനിധികളായിരുന്നില്ല, മറിച്ച് അല്ലാഹുവിന്റെ പ്രീതി മാത്രം ലക്ഷ്യം വെച്ച മൂന്ന് ജ്വലിക്കുന്ന തീക്കനലുകളായിരുന്നു.

അല്ലാഹുവിന്റെ പ്രീതി തേടിയ ഔഫ് (റ) :അഫ്‌റ (റ) യുടെ മൂത്ത മകൻ

അഫ്‌റയുടെ മക്കളിൽ മൂത്തവനായിരുന്നു ഔഫ്(റ). ബദറിലെ പോരാട്ടത്തിന് തൊട്ടുമുമ്പ്, ഔഫ് ബിൻ അൽ ഹാരിസ് (റ) പ്രവാചകൻ (സ്വ)-യുടെ അരികിലെത്തി. ആ മുഖത്ത് അല്ലാഹുവിനോടും റസൂലിനോടുമുള്ള അടങ്ങാത്ത ആഗ്രഹം മാത്രം ബാക്കി. അദ്ദേഹം ചോദിച്ചു: "റസൂലേ(സ), അല്ലാഹുവിനെ സന്തോഷിപ്പിക്കുന്ന കാര്യം എന്താണ്?"

പ്രവാചകൻ (സ്വ) മറുപടി നൽകി: "കവചമൊന്നുമില്ലാതെ, ശത്രുനിരയിലേക്ക് കുതിച്ചുചാടുന്ന അടിമയെ അല്ലാഹുവിന് വലിയ ഇഷ്ടമാണ്."

ആ വാക്കുകൾ കേട്ടതും, ഒട്ടും ആലോചിക്കാതെ അദ്ദേഹം തന്റെ അങ്കിയും കവചവും ഊരിയെറിഞ്ഞു. മരണത്തെ ഭയക്കാതെ വാളുമെടുത്ത് ശത്രുക്കൾക്കിടയിലേക്ക് അദ്ദേഹം കുതിച്ചു. ആ പോരാട്ടത്തിൽ അദ്ദേഹം രക്തസാക്ഷിയായി. അല്ലാഹുവിന്റെ പ്രീതി തേടിയ ആ ചെറുപ്പക്കാരൻ സ്വർഗ്ഗത്തിന്റെ കവാടങ്ങൾ കടന്നു.

ബദറിലെ സിംഹങ്ങൾ: അബൂ ജഹ്‌ലിനെ തേടി

ബദ്ർ യുദ്ധക്കളം. ചുട്ടുപൊള്ളുന്ന മരുഭൂമിയിൽ ആകാശത്ത് സൂര്യൻ ജ്വലിച്ചുനിൽക്കുന്നു. വായുവിൽ അദൃശ്യമായൊരു പിരിമുറുക്കം തങ്ങിനിന്നിരുന്നു. സത്യവിശ്വാസികളുടെ സംഘം ശത്രുനിരയെ നേരിടാൻ സജ്ജമായി അണിനിരന്നു.

അബ്ദുർറഹ്മാൻ ബ്നു ഔഫ് (റ) ആ നിരയിൽ നിൽക്കുകയാണ്. ചുറ്റും കണ്ണോടിച്ചപ്പോൾ അദ്ദേഹമൊരു കാര്യം ശ്രദ്ധിച്ചു. തനിക്ക് ഇരുവശത്തുമായി നിൽക്കുന്നത് അൻസാറുകളിലെ രണ്ട് ചെറുപ്പക്കാരായ ബാലന്മാരാണ്. അവരുടെ മുഖത്ത് യൗവനത്തിന്റെ തുടിപ്പും നിഷ്കളങ്കതയുമുണ്ട്. ഇതുകണ്ടപ്പോൾ അദ്ദേഹത്തിന്റെ മനസ്സ് ചെറുതായൊന്ന് മന്ത്രിച്ചു: " ഈ ബാലന്മാർക്ക് പകരം അല്പം കൂടി ശക്തിയുള്ള പരിചയസമ്പന്നരായ യോദ്ധാക്കൾ എന്റെ കൂടെയുണ്ടായിരുന്നെങ്കിൽ! യുദ്ധത്തിന്റെ കടുപ്പമേറിയ നിമിഷങ്ങളിൽ ഇവർക്ക് പിടിച്ചുനിൽക്കാൻ കഴിയുമോ?"

എന്നാൽ, ആ ആശങ്കയ്ക്ക് അധികം ആയുസ്സുണ്ടായിരുന്നില്ല. പെട്ടെന്ന്, തനിക്ക് അരികിൽ നിന്ന ആ ബാലന്മാരിൽ ഒരാൾ അബ്ദുർറഹ്മാന്റെ വസ്ത്രത്തിൽ മെല്ലെ തട്ടി ശ്രദ്ധ ആകർഷിച്ചു. ആ കണ്ണുകളിൽ അസാധാരണമായൊരു തിളക്കവും ദൃഢനിശ്ചയവുമുണ്ടായിരുന്നു.

"അമ്മാവാ," അവൻ താഴ്ന്ന സ്വരത്തിൽ ചോദിച്ചു, "നിങ്ങൾക്കറിയാമോ അബൂജഹലിനെ? അവൻ എവിടെയാണ്?"

അബ്ദുർറഹ്മാൻ (റ) അമ്പരപ്പോടെ അവനെ നോക്കി. "എന്താണ് കുഞ്ഞേ നിന്റെ ആവശ്യം? എന്തിനാണ് നീ അവനെ അന്വേഷിക്കുന്നത്?"

ആ ബാലന്റെ മുഖം ഗൗരവത്തിലായി. ദേഷ്യവും വേദനയും കലർന്ന സ്വരത്തിൽ അവൻ പറഞ്ഞു: "എനിക്ക് അറിവുലഭിച്ചിട്ടുണ്ട്, അവൻ അല്ലാഹുവിന്റെ റസൂലിനെ (ﷺ) അധിക്ഷേപിക്കുന്നുവെന്ന്. എന്റെ ആത്മാവ് ആരുടെ കൈയ്യിലാണോ, അവനാണ് സത്യം! ഞാൻ അവനെ കണ്ടുമുട്ടിയാൽ, ഞങ്ങൾ രണ്ടുപേരിൽ ഒരാൾ മരണം വരിക്കുന്നത് വരെ ഞാൻ അവനെ വിടില്ല!"

അബ്ദുർറഹ്മാൻ (റ)അമ്പരന്നുപോയി. ശത്രുക്കളുടെ നേതാവാണ് അബൂജഹ്ൽ. യുദ്ധ സമയത്ത് എപ്പോഴും കൂടുതൽ സംരക്ഷണം അയാൾക്കുണ്ടാകും.ശത്രുക്കളുടെ തലവനായ അബൂജഹലിനെ നേരിടാൻ ഇത്രയും ചെറിയ ഒരു ബാലന് ഇത്ര വലിയ ചങ്കുറപ്പോ! അപ്പോഴേക്കും മറ്റേ ബാലനും അരികിലേക്ക് വന്ന് അതെ കാര്യം തന്നെ ആവർത്തിച്ചു. അവരുടെയും ഉദ്ദേശം ഒന്നുമാത്രമായിരുന്നു—തങ്ങളുടെ പ്രിയപ്പെട്ട പ്രവാചകനെ (ﷺ) ആക്ഷേപിച്ചവന് അർഹമായ ശിക്ഷ നൽകുക.

പെട്ടെന്നാണ് അബ്ദുർറഹ്മാൻ (റ) തിരക്കിനിടയിലൂടെ ആ ശത്രുവിനെ കാണുന്നത്. അബൂജഹൽ അഹങ്കാരത്തോടെ ശത്രുക്കൾക്കിടയിലൂടെ ചുറ്റിനടക്കുന്നു. അബ്ദുർറഹ്മാൻ വിരൽ ചൂണ്ടി പറഞ്ഞു: "അതാ! നിങ്ങൾ അന്വേഷിക്കുന്ന ആൾ അതാ വരുന്നു."

പിന്നെ നടന്നത് മിന്നൽ വേഗത്തിലായിരുന്നു. മറുത്തൊന്നും ആലോചിക്കാൻ അബ്ദുർറഹ്മാൻ (റ) സമയം കിട്ടിയില്ല. ആ രണ്ട് ബാലന്മാരും സിംഹങ്ങളെപ്പോലെ അബൂജഹലിന് നേരെ പാഞ്ഞുചെന്നു. ആ ഉറച്ച തീരുമാനത്തിന് മുന്നിൽ ബദ്റിന്റെ പോരാളികളിൽ ഏറ്റവും വലിയ ശത്രുവിന് പിടിച്ചുനിൽക്കാനായില്ല. അവരുടെ വാളുകൾക്ക് മുന്നിൽ അബൂജഹൽ വീണു.ബദ്ർ യുദ്ധം അവസാനിച്ച ഉടനെ, ഈ ഉമ്മത്തിന്റെ 'ഫിർഔൻ' ആയ അബൂജഹൽ കൊല്ലപ്പെട്ടോ എന്ന് ഉറപ്പുവരുത്താൻ പ്രവാചകൻ ﷺ തന്റെ അനുചരരോട് നിർദ്ദേശിച്ചു. അബ്ദുല്ലഹിബ്നു മസ്ഊദ് (റ) അവിടേക്ക് പുറപ്പെട്ടു.യുദ്ധക്കളത്തിലെ ശവശരീരങ്ങൾക്കിടയിലൂടെ അബ്ദുല്ലഹിബ്നു മസ്ഊദ് (റ) നടന്നു. ഒടുവിൽ, മാരകമായി മുറിവേറ്റ് പിടയുന്ന അബൂജഹലിനെ അദ്ദേഹം കണ്ടെത്തി. നേരത്തെ അൻസാരി യുവാക്കൾ നൽകിയ മുറിവുകൾ കാരണം അവന്റെ ആയുസ്സ് അസ്തമിക്കാറായിരുന്നു.

അബ്ദുല്ലഹിബ്നു മസ്ഊദ് (റ) അവന്റെ അടുത്തേക്ക് ചെന്നു. തന്റെ പാദം അവന്റെ കഴുത്തിൽ വെച്ചു. അപ്പോഴും അഹങ്കാരം കൈവിടാത്ത അബൂജഹൽ ചോദിച്ചു: "ആടുകളെ മേയ്ക്കുന്ന ഇടയനായ നീ എന്തിനാണ് ഇവിടെ വന്നിരിക്കുന്നത്?" (അദ്ദേഹത്തിന്റെ പഴയ തൊഴിലിനെ പരിഹസിച്ചുകൊണ്ടായിരുന്നു ആ ചോദ്യം).അബ്ദുല്ലഹിബ്നു മസ്ഊദ് (റ) ശാന്തനായി മറുപടി നൽകി: "അല്ലാഹുവിന്റെ ശത്രുവേ, ഇന്ന് അല്ലാഹു നിന്നെ അപമാനിച്ചിരിക്കുന്നു." തുടർന്ന് അദ്ദേഹം അബൂജഹലിന്റെ തല കൊയ്യുകയും, ആ തലയുമായി പ്രവാചകന്റെ ﷺ അരികിലേക്ക് വരികയും ചെയ്തു. അബൂജഹലിന്റെ മരണം സ്ഥിരീകരിച്ചപ്പോൾ, അത് ഇസ്‌ലാമിന്റെയും സത്യവിശ്വാസികളുടെയും വലിയൊരു വിജയമായി പ്രവാചകൻ ﷺ വാഴ്ത്തി.

അബ്ദുർറഹ്മാൻ ബ്നു ഔഫ് (റ) പിന്നീട് അത്ഭുതത്തോടെ ഓർത്തു: ശാരീരികമായി ഞാൻ കരുത്തരെന്ന് കരുതിയവരെയല്ല, മറിച്ച് അല്ലാഹുവിന്റെ റസൂലിനോടുള്ള സ്നേഹം കൊണ്ട് ഹൃദയം നിറഞ്ഞുനിന്ന ഈ രണ്ട് ബാലന്മാരെയാണ് അല്ലാഹു ആ വലിയ കാര്യത്തിന് നിശ്ചയിച്ചിരുന്നത്.ഈ യുവാക്കളിൽ ഒരാൾ അഫ്‌റയുടെ (റ) ഇളയ മകൻ മുഅവ്വിദ് ബിൻ അൽ ഹാരിസ് (റ) ആയിരുന്നു. യുദ്ധക്കളത്തിൽ ധീരമായി പൊരുതിയ അദ്ദേഹം, അല്ലാഹുവിന്റെ മാർഗ്ഗത്തിൽ ശഹീദായി.

സഹോദരങ്ങളുടെ വിധിയും ത്യാഗവും

ബദറിന്റെ മണൽപ്പരപ്പിൽ ഈ മൂന്ന് സഹോദരങ്ങളുടെയും വിധിയെഴുത്ത് ഇപ്രകാരമായിരുന്നു:

ഔഫ് ബിൻ അൽ ഹാരിസ് (عوف بن الحارث) (റ): യുദ്ധത്തിന്റെ കടുപ്പമേറിയ നേരത്ത് ശത്രുക്കളോട് പൊരുതി അദ്ദേഹം ശഹീദായി.അഫ്‌റയുടെ മക്കളിൽ മൂത്തവനായിരുന്നു ഔഫ്ബ(റ)

മുഅവ്വിദ് ബിൻ അൽ ഹാരിസ് (معوذ بن الحارث) (റ): യുദ്ധക്കളത്തിൽ ധീരമായി പൊരുതിയ അദ്ദേഹം, അല്ലാഹുവിന്റെ മാർഗ്ഗത്തിൽ ശഹീദായി.അഫ്‌റയുടെ മക്കളിൽ ഏറ്റവും ഇളയവനായിരുന്നു മുഅവ്വിദ് ബിൻ അൽ ഹാരിസ് (റ).

മുആദ് ബിൻ അൽ ഹാരിസ് (معاذ بن الحارث) (റ): അബൂ ജഹ്‌ലിനെ ആക്രമിച്ചവരിൽ ഒരാളായിരുന്ന അദ്ദേഹം, ആ യുദ്ധത്തെ അതിജീവിക്കുകയും തുടർന്നും ഇസ്‌ലാമിക ചരിത്രത്തിൽ പല സേവനങ്ങൾക്കായി ജീവിച്ചിരിക്കുകയും ചെയ്തു.

അഫ്റാഇന്റെ ഈ മൂന്ന് പുത്രന്മാർ ചരിത്രത്തിന്റെ ഏടുകളിൽ ഇന്നും ജീവിക്കുന്നു. ഒരു ഉമ്മയുടെ സ്നേഹത്തണലിൽ വളർന്ന്, പ്രവാചകന്റെ (സ) വാക്കുകളിൽ വിശ്വാസം കരുപ്പിടിപ്പിച്ച്, അല്ലാഹുവിന്റെ പ്രീതിക്കായി ജീവൻ ബലിയർപ്പിച്ച ആ ധീരത ഇന്നും ഓരോ വിശ്വാസിക്കും ആവേശമാണ്. ഔഫും (റ) മുഅവ്വിദും (റ). അവർ ശഹാദത്തിന്റെ ഉന്നത പദവിയിൽ പുഞ്ചിരിക്കുമ്പോൾ, മുആദ് (റ) ചരിത്രത്തിന്റെ സാക്ഷിയായി മണ്ണിൽ നിലനിന്നു.