ഇസ്ലാമിക കലണ്ടറിലെ ഏഴാമത്തെ മാസമായ റജബ്, കേവലം ഒരു കാലഗണനയല്ല, മറിച്ച് പ്രപഞ്ചനാഥന്റെ സവിശേഷമായ കരുണയും പ്രകാശവും വർഷിക്കുന്ന അതീവ പാവനമായ ഒരു ആത്മീയ സങ്കേതമാണ്. ആത്മജ്ഞാനികൾക്കിടയിൽ ഈ മാസം "അല്ലാഹുവിന്റെ മാസം" (ശഹ്റുല്ലാഹ്) എന്നറിയപ്പെടുന്നു. തിരുനബി(സ)യുടെ വചനങ്ങളെ ആസ്പദമാക്കി റജബിനെ ആത്മീയ കൃഷിയുടെ ആരംഭമായി ജ്ഞാനികൾ ദർശിക്കുന്നു. റമദാൻ എന്ന വിളവെടുപ്പ് കാലത്തിലേക്ക് വിശ്വാസിയെ പാകപ്പെടുത്തുന്ന ജ്ഞാനത്തിന്റെ വിത്തുപാകലാണ് റജബിൽ സംഭവിക്കുന്നത്.
റജബ്: പദോൽപ്പത്തിയും ആത്മീയ അർത്ഥതലങ്ങളും
"റജബ്" എന്ന പദത്തിന്റെ മൂലം 'റജബ' എന്ന അറബിക് ക്രിയയാണ്. ഇതിനർത്ഥം ആദരിക്കുക, ബഹുമാനിക്കുക, മഹത്വപ്പെടുത്തുക എന്നാണ്. ഇസ്ലാമിന് മുൻപുള്ള കാലഘട്ടത്തിൽ പോലും അറബികൾ ഈ മാസത്തെ അതീവ പവിത്രമായി കരുതിയിരുന്നു. യുദ്ധങ്ങൾ നിഷിദ്ധമായ നാല് വിശുദ്ധ മാസങ്ങളിൽ (അൽ-അശ്ഹുറുൽ ഹുറും) ഒന്നാണ് റജബ്. എന്നാൽ മറ്റു മൂന്ന് മാസങ്ങളും (ദുൽഖഅദ്, ദുൽഹിജ്ജ, മുഹറം) തുടർച്ചയായി വരുമ്പോൾ റജബ് മാത്രം ഒറ്റപ്പെട്ടു നിൽക്കുന്നു. അതിനാൽ ഇതിനെ 'റജബുൽ ഫർദ്' (ഒറ്റപ്പെട്ടു നിൽക്കുന്ന റജബ്) എന്ന് വിളിക്കുന്നു.
സൂഫീ വീക്ഷണകോണിൽ, ഈ പദത്തിലെ ഓരോ അക്ഷരത്തിനും അഗാധമായ അർത്ഥങ്ങളുണ്ട്. 'റ' (ر) അല്ലാഹുവിന്റെ കാരുണ്യത്തെയും (റഹ്മത്ത്), 'ജീം' (ج) അവന്റെ ഔദാര്യത്തെയും (ജൂദ്), 'ബാ' (ب) അവന്റെ നന്മയെയും (ബിർറ്) സൂചിപ്പിക്കുന്നു. ഈ മൂന്ന് ഗുണങ്ങളും സമന്വയിക്കുന്ന മാസമായതിനാലാണ് ഇതിനെ അല്ലാഹുവിന്റെ മാസമെന്ന് വിശേഷിപ്പിക്കുന്നത്. മാലാഖമാരുടെ മധ്യസ്ഥതയില്ലാതെ അല്ലാഹുവിന്റെ സവിശേഷമായ പ്രകാശങ്ങൾ നേരിട്ട് ഹൃദയങ്ങളിലേക്ക് പ്രവഹിക്കുന്ന കാലമാണിതെന്ന് ജ്ഞാനികൾ പഠിപ്പിക്കുന്നു.
റജബ് മാസത്തിന് ഇസ്ലാമിക ചരിത്രത്തിലും ആത്മീയ കൃതികളിലും നിരവധി പേരുകൾ നൽകപ്പെട്ടിട്ടുണ്ട്. ഈ പേരുകൾ ഓരോന്നും മാസത്തിന്റെ സവിശേഷമായ ഗുണങ്ങളെ വെളിപ്പെടുത്തുന്നു. ഒന്ന്, റജബുൽ അസബ്ബ് (വർഷിക്കുന്ന മാസം) - അല്ലാഹുവിന്റെ കാരുണ്യം വിശ്വാസികളിൽ സമൃദ്ധമായി വർഷിക്കുന്നു.മറ്റൊന്ന്, റജബുൽ അസമ്മ് (നിശബ്ദമായ മാസം) - യുദ്ധങ്ങളുടെ ശബ്ദമില്ലാത്ത, ആത്മീയ നിശബ്ദതയുടെ കാലം. മൂന്നാമത്തേത്, റജബുൽ മുറജ്ജബ് (അതീവ ബഹുമാന്യമായത്) ഇലാഹീ പ്രകാശത്താൽ മഹത്വീകരിക്കപ്പെട്ട മാസം. നാലാമതായി, ശഹ്റുൽ ഇസ്തിഗ്ഫാർ (പാപമോചനത്തിന്റെ മാസം) - ഹൃദയത്തെ ശുദ്ധീകരിക്കാൻ ഏറ്റവും അനുയോജ്യമായ സമയം. അഞ്ചാമതായി, ശഹ്റുല്ലാഹ് (അല്ലാഹുവിന്റെ മാസം) റബ്ബിന്റെ സത്തയുമായി (ദാത്) നേരിട്ട് ബന്ധപ്പെടുന്ന മാസം.
റജബ് എന്നത് കേവലം ഒരു മാസത്തിന്റെ പേര് മാത്രമല്ല, മറിച്ച് ഒരു ആത്മീയ പ്രക്രിയയുടെ തുടക്കമാണ്. ഇമാം അബൂബക്കർ അൽ-വാറഖ് അൽ-ബൽഖി (റ) ഈ മാസത്തെ ഒരു കർഷകന്റെ അധ്വാനത്തോടാണ് ഉപമിച്ചിരിക്കുന്നത്: "റജബ് വിത്തുപാകേണ്ട മാസമാണ്, ശഅ്ബാൻ ജലസേചനം നടത്തേണ്ട മാസമാണ്, റമദാൻ വിളവെടുക്കേണ്ട മാസമാണ്". ഈ ഉപമയിൽ 'വിത്ത്' എന്നത് തൗബയെയും (പാശ്ചാതാപം) സദുദ്ദേശ്യത്തെയുമാണ് സൂചിപ്പിക്കുന്നത്. ഒരു വിശ്വാസി തന്റെ ഹൃദയമാകുന്ന മണ്ണിൽ പാശ്ചാതാപത്തിന്റെ വിത്തിടുമ്പോൾ, ആത്മീയ യാത്രയുടെ അടിത്തറ അവിടെ പാകപ്പെടുന്നു. റജബിൽ വിത്തിടാത്ത ഒരാൾക്ക് റമദാനിൽ ആത്മീയ ഫലങ്ങൾ കൊയ്തെടുക്കാൻ സാധിക്കില്ല. ഹൃദയത്തിലെ കളകൾ നീക്കം ചെയ്യുകയും പാപമോചനത്തിലൂടെ മണ്ണിനെ പാകപ്പെടുത്തുകയും ചെയ്യുക എന്നതാണ് റജബിന്റെ ദൗത്യം. മറ്റൊരു മനോഹരമായ ഉപമയിൽ അദ്ദേഹം പറയുന്നു: "റജബ് കാറ്റുപോലെയാണ്, ശഅ്ബാൻ മേഘം പോലെയാണ്, റമദാൻ മഴ പോലെയാണ്". കാറ്റ് വീശുമ്പോൾ മഴയ്ക്കുള്ള അന്തരീക്ഷം ഒരുങ്ങുന്നതുപോലെ, റജബിലെ ആരാധനകൾ വിശ്വാസിയുടെ ഉള്ളിൽ ആത്മീയ പരിവർത്തനത്തിന്റെ തണുത്ത കാറ്റായി വീശുന്നു. ഇത് പിന്നീട് ശഅ്ബാനിൽ പ്രവാചക പ്രേമത്തിന്റെ മേഘങ്ങളായി മാറുകയും റമദാനിൽ ഖുർആനിക പ്രകാശത്തിന്റെ മഴയായി പെയ്യുകയും ചെയ്യുന്നു.
ശൈഖുൽ അക്ബർ ഇബ്നു അറബിയും 'റജബിയ്യൂനും
ആത്മജ്ഞാനികളുടെ ലോകത്തെ അതികായനായ ശൈഖുൽ അക്ബർ മുഹ്യുദ്ധീൻ ഇബ്നു അറബി (റ) തന്റെ 'അൽ-ഫുതൂഹാത്തുൽ മക്കിയ്യ'യിൽ റജബ് മാസത്തെക്കുറിച്ച് അതീവ രഹസ്യാത്മകമായ ജ്ഞാനങ്ങൾ പങ്കുവെക്കുന്നുണ്ട്. അതിൽ ഏറ്റവും പ്രധാനപ്പെട്ട ഒന്നാണ് 'റജബിയ്യൂൻ' (റജബ് മാസക്കാർ) എന്ന സവിശേഷമായ ഔലിയാക്കളുടെ വിഭാഗം.ഇബ്നു അറബി(റ)യുടെ വിശദീകരണമനുസരിച്ച്, പ്രപഞ്ചത്തിന്റെ ആത്മീയ നിലനിൽപ്പിന് കാരണക്കാരായ 'രിജാലുൽ ഗൈബ്' (അദൃശ്യരായ പുരുഷന്മാർ) എന്ന വിഭാഗത്തിൽ പെട്ടവരാണ് ഇവർ. ഏതു കാലത്തും നാൽപ്പത് പേരാണ് റജബിയ്യൂനായി ഉണ്ടാവുക. അവരുടെ പ്രത്യേകത, റജബ് മാസം പിറക്കുന്നത് മുതൽ മാസം അവസാനിക്കുന്നത് വരെ അവർക്ക് സവിശേഷമായ ഒരു ആത്മീയ ഉൽക്കണ്ഠയും അവസ്ഥയും (ഹാൽ) അനുഭവപ്പെടുന്നു എന്നതാണ്. റജബ് മാസം കഴിഞ്ഞാൽ ഈ അവസ്ഥ അവരിൽ നിന്ന് നീങ്ങുന്നു. റജബിയ്യൂനിന്റെ സവിശേഷമായ കശ്ഫ് (വെളിപാടുകൾ), റജബിയ്യൂനിന് അല്ലാഹു നൽകുന്ന ഒരു പ്രത്യേക ദാനമാണ് ആത്മീയമായ ഉൾക്കാഴ്ച അല്ലെങ്കിൽ 'കശ്ഫ്'. മനുഷ്യരുടെ ഹൃദയങ്ങളിലെ കാപട്യങ്ങളെ തിരിച്ചറിയാൻ ഇവർക്ക് സാധിക്കുമെന്ന് ഇബ്നു അറബി (റ) സാക്ഷ്യപ്പെടുത്തുന്നു. തന്റെ സഞ്ചാരത്തിനിടയിൽ ടർക്കിയിലെ ദുനൈസിറിൽ വെച്ച് ഇത്തരമൊരു വ്യക്തിയെ കണ്ടുമുട്ടിയ കാര്യം അദ്ദേഹം ഫുതൂഹാത്തിൽ വിവരിക്കുന്നുണ്ട്. ചില പ്രത്യേക വിഭാഗങ്ങളുടെ ആന്തരിക രൂപം നായ്ക്കളായും മറ്റു ജീവികളായും കാണാൻ ഇവർക്ക് സാധിക്കുമത്രെ. ഇത് കേവലം ഭൗതികമായ കാഴ്ചയല്ല, മറിച്ച് മനുഷ്യരുടെ ദുർഗുണങ്ങൾ അവരുടെ ആത്മീയ ശരീരത്തിൽ വരുത്തുന്ന മാറ്റങ്ങളെ ദർശിക്കലാണ്.
ആത്മീയ ശ്രേണിയിൽ റജബിയ്യൂങ്ങനിന് വലിയ സ്ഥാനമാണുള്ളത്. ലോകത്തെ താങ്ങിനിർത്തുന്ന നാല് 'ഔതാദുകളിൽ' ഒരാൾ മരണപ്പെട്ടാൽ, ഈ നാൽപ്പത് റജബിയ്യൂനിനിൽ നിന്നുള്ള ഒരാളെയാണ് ആ സ്ഥാനത്തേക്ക് അല്ലാഹു ഉയർത്തുന്നത്. എന്നാൽ ഒരാൾ ഔതാദായി ഉയർത്തപ്പെട്ടാൽ, റജബിയ്യൂനിനുണ്ടായിരുന്ന ആ സവിശേഷമായ 'കശ്ഫ്' അവരിൽ നിന്ന് നീക്കം ചെയ്യപ്പെടുന്നു. പ്രപഞ്ചത്തിന്റെ നിലനിൽപ്പിന് കാരണക്കാരായ ഔതാദുകൾക്ക് മനുഷ്യരുടെ പോരായ്മകൾ വെളിപ്പെടുത്തിക്കൊടുക്കാതെ, എല്ലാവരോടും കാരുണ്യത്തോടെ വർത്തിക്കാനാണ് അല്ലാഹു ഇപ്രകാരം ചെയ്യുന്നത്.
ഇസ്റാഉം മിഅ്റാജും: ആത്മീയ ഉന്നതിയുടെ വിളംബരം
റജബ് മാസത്തിന്റെ ഏറ്റവും പ്രകാശമാനമായ ഏടാണ് ഇസ്റാഉം മിഅ്റാജും. മിക്ക പണ്ഡിതന്മാരുടെയും അഭിപ്രായത്തിൽ റജബ് 27-ാം രാവിലാണ് ഈ വിസ്മയകരമായ രാത്രി പ്രയാണം നടന്നത്. മക്കയിലെ മസ്ജിദുൽ ഹറാമിൽ നിന്ന് ഖുദ്സിലെ മസ്ജിദുൽ അഖ്സയിലേക്കും അവിടെ നിന്ന് ആകാശലോകങ്ങളിലേക്കുമുള്ള തിരുനബി(സ)യുടെ യാത്ര കേവലം ഒരു ചരിത്ര സംഭവമല്ല, മറിച്ച് ആത്മീയതയുടെ പരമകാഷ്ഠയിലേക്കുള്ള മനുഷ്യാത്മാവിന്റെ യാത്രയുടെ മാതൃകയാണ്. മിഅ്റാജ് നടന്നത് റജബിലായത് ഈ മാസത്തിന്റെ പ്രാധാന്യം വർദ്ധിപ്പിക്കുന്നു. അല്ലാഹു തന്റെ ഏറ്റവും പ്രിയപ്പെട്ട ദാസനെ തന്നിലേക്ക് നേരിട്ട് വിളിച്ചുവരുത്തിയ ഈ മാസം, ഓരോ വിശ്വാസിക്കും അല്ലാഹുവിലേക്ക് അടുക്കാനുള്ള സുവർണ്ണാവസരമാണ്. നിസ്കാരം എന്ന പുണ്യകർമ്മം ഉമ്മത്തിന് ലഭിക്കുന്നത് ഈ യാത്രയിലാണ്. "നിസ്കാരം വിശ്വാസിയുടെ മിഅ്റാജാണ്" എന്ന തത്വം സൂഫികൾ ഇതിനോട് ചേർത്തുവായിക്കുന്നു.
സൂഫീ ത്വരീഖത്തുകളിൽ റജബ് മാസം ആരാധനകളാൽ നിബിഡമാണ്. ഇത് ഹൃദയത്തെ ശുദ്ധീകരിക്കാനുള്ള (തസ്കിയത്തുന്നഫ്സ്) മാസമായതിനാൽ 'ഇസ്തിഗ്ഫാർ' (പാപമോചനം തേടൽ) ആണ് ഏറ്റവും പ്രധാനപ്പെട്ട കർമ്മം. റജബ് മാസത്തിൽ അല്ലാഹു തന്റെ ദാസന്മാർക്ക് നൽകുന്ന ഒരു പ്രത്യേക ഓഫറാണ് ഇസ്തിഗ്ഫാർ. "റജബ് അല്ലാഹുവിന്റെ മാസമാണ്, അതിനാൽ ഈ മാസത്തിൽ പാപമോചനം വർദ്ധിപ്പിക്കുക" എന്ന് മഹത്തുക്കൾ പഠിപ്പിക്കുന്നു. ഹബീബ് ഹസൻ ബിൻ അബ്ദുല്ല ബിൻ അലവി അൽ-ഹദ്ദാദ് സമാഹരിച്ച 'ഇസ്തിഗ്ഫാറു റജബ്' എന്ന സവിശേഷ പ്രാർത്ഥന ഇതിന് ഉദാഹരണമാണ്. ഹൃദയത്തിന്റെ ആഴങ്ങളിൽ അടിഞ്ഞുകൂടിയ അന്ധകാരത്തെ നീക്കം ചെയ്യാൻ ഇസ്തിഗ്ഫാറിന് സാധിക്കുന്നു.
തിരുനബി(സ)യുടെ ഒരു ഹദീസ് ഇങ്ങനെ വായിക്കാൻ സാധിക്കും, "സ്വർഗ്ഗത്തിൽ റജബ് എന്ന് പേരുള്ള ഒരു നദിയുണ്ട്. അത് പാലിനേക്കാൾ വെളുത്തതും തേനിനേക്കാൾ മധുരമുള്ളതുമാണ്". ഈ നദിയെ ഒരു ജ്ഞാനത്തിന്റെ പ്രതീകമായാണ് സൂഫികൾ കാണുന്നത്. റജബ് മാസത്തിൽ നോമ്പ് അനുഷ്ഠിക്കുന്നവർക്ക് ഈ ജ്ഞാനനദിയിൽ നിന്ന് പാനം ചെയ്യാൻ സാധിക്കുമെന്ന് ജ്ഞാനികൾ വിശ്വസിക്കുന്നു.
സൂഫീ ജ്ഞാനശാസ്ത്രത്തിൽ 'നൂഖ്ത' (ബിന്ദു) എന്ന സങ്കല്പത്തിന് വലിയ പ്രാധാന്യമുണ്ട്. പ്രപഞ്ചത്തിന്റെ ഉൽപ്പത്തി ഒരു ബിന്ദുവിൽ നിന്നാണ്. റജബ് മാസം ഈ പ്രപഞ്ച ബിന്ദുവിന്റെ പ്രകാശത്തിന്റെ ആഘോഷമാണ്. "ഞാൻ ഒരു നിഗൂഢ നിധിയായിരുന്നു, അറിയപ്പെടാൻ ഞാൻ ആഗ്രഹിച്ചു" എന്ന ഹദീസുൽ ഖുദ്സിയെ മുൻനിർത്തി, അല്ലാഹു തന്നെത്തന്നെ വെളിപ്പെടുത്താൻ തുടങ്ങിയ മാസമായി റജബിനെ കാണുന്നവരുണ്ട്. അല്ലാഹുവിന്റെ അനന്തമായ സ്നേഹം പ്രപഞ്ചമായി വിരിഞ്ഞതിന്റെ തുടക്കം ഈ മാസമാണെന്ന് ചിലർ നിരീക്ഷിക്കുന്നു.ഈ പ്രകാശത്തെ ഹൃദയത്തിലേക്ക് ആവാഹിക്കാനാണ് സൂഫികൾ റജബിൽ നിർദ്ദേശിക്കുന്ന പ്രത്യേക 'ദിക്റുകൾ'. ആ ദിക്റുകൾ ലക്ഷക്കണക്കിന് റജബിൽ ലക്ഷം തവണ ചൊല്ലി പൂർത്തിയാക്കുന്നത് (ഖത്മുന്നുർ) ഹൃദയത്തെ പാപങ്ങളുടെ അന്ധകാരത്തിൽ നിന്ന് മോചിപ്പിക്കാൻ സഹായിക്കുന്നു.
റജബ് ഒരു വിശ്വാസിയുടെ ആത്മീയ ജീവിതത്തിലെ നിശബ്ദമായ വിപ്ലവമാണ്. അത് അല്ലാഹുവിന്റെ മാസമെന്ന നിലയിൽ അവന്റെ സത്തയിലേക്ക് നമ്മെ ക്ഷണിക്കുന്നു. ശൈഖുൽ അക്ബർ ഇബ്നു അറബി(റ) വിവരിച്ച റജബിയ്യൂങ്ങളെപ്പോലെ ഹൃദയദർശനം സാധ്യമാക്കണമെങ്കിൽ, പാശ്ചാതാപത്തിന്റെ മണ്ണിൽ വിത്തിടാൻ നാം തയ്യാറാകണം. ഇസ്റാഉം മിഅ്റാജും പഠിപ്പിക്കുന്ന ആത്മീയ ഉന്നതിയിലേക്ക് ഉയരാൻ റജബിലെ ഓരോ നിമിഷവും ഉപയോഗപ്പെടുത്തണം. റജബിലെ 'കാറ്റ്' ആഞ്ഞുവീശുമ്പോൾ മാത്രമേ ശഅ്ബാനിലെ 'മേഘങ്ങൾ' രൂപപ്പെടുകയുള്ളൂ. ആത്മീയ പന്ഥാവിലെ സഞ്ചാരികൾക്ക് റജബ് ഒരു തുടക്കമാണ്, കരുണയുടെയും പ്രകാശത്തിന്റെയും അനന്തമായ പ്രവാഹത്തിലേക്കുള്ള ആദ്യ ചുവടുവെപ്പ്. ഈ മാസത്തെ വേണ്ടവിധം ആദരിക്കുന്നവർക്ക് അല്ലാഹുവിന്റെ പ്രത്യേകമായ സംരക്ഷണവും ജ്ഞാനവും ലഭിക്കുമെന്നതിൽ സംശയമില്ല. ആത്യന്തികമായി, റജബ് എന്നത് മനുഷ്യാത്മാവ് തന്റെ നാഥനിലേക്ക് മടങ്ങാനുള്ള പ്രണയാതുരമായ വിളി കേൾക്കുന്ന മാസമാണ്.
Connect with Us